Gürcüstanın müdafiə naziri İrakli Çikovani Parisdə fransalı həmkarı Ketrin Votren ilə görüşüb

Gürcüstanın Baş nazirinin müavini, müdafiə naziri İrakli Çikovani Parisdə fransalı həmkarı Ketrin Votren ilə görüş keçirib.

Gürcüstan Müdafiə Nazirliyinin məlumatına görə, İrakli Çikovani dəvətə görə təşəkkürünü bildirib və dünyada mövcud olan mürəkkəb vəziyyət fonunda dövlətlər arasında tərəfdaşlıq və əməkdaşlığın əhəmiyyətini vurğulayıb.

Məlumatda qeyd olunur ki, Gürcüstanın müdafiə naziri Fransanın Gürcüstanın ərazi bütövlüyü və suverenliyinə göstərdiyi sarsılmaz dəstəyə görə minnətdarlığını ifadə edib.

Görüşdə iki ölkə arasında müdafiə sahəsində səmərəli əməkdaşlıq, o cümlədən dağ hazırlığı, təhsil və hava hücumundan müdafiə istiqamətləri nəzərdən keçirilib, gələcək əməkdaşlıq perspektivləri müzakirə olunub.

Görüşdə Gürcüstan Müdafiə Qüvvələri komandanının müavini, Baş Qərargah rəisi general-mayor Coni Tatunaşvili, Gürcüstanın Fransadakı fövqəladə və səlahiyyətli səfiri İrakli Kuraşvili, hərbi attaşe polkovnik Malkhaz Merlani və polkovnik Vasili Kopeykin iştirak ediblər.

Bu barədə Gürcüstan Müdafiə Nazirliyinin yaydığı məlumatda bildirilir.