Gürcüstanın Milli Bankının Pul Siyasəti Komitəsi 2026-cı ilin fevralın 11-də keçirilən iclasında pul siyasətinin faiz dərəcəsini (yenidən maliyyələşdirmə dərəcəsini) dəyişməz saxlayıb. Pul siyasətinin faiz dərəcəsi 8.0 faiz təşkil edir.
2026-cı ilin yanvar ayına olan vəziyyətə görə, Gürcüstanda qiymətlərin ümumi səviyyəsi illik 4.8 faizlə artıb. Hədəfdən yuxarı inflyasiyanı böyük ölçüdə yenə də ərzaq inflyasiyası şərtləndirir. Bir tərəfdən, Gürcüstanın istehlak səbətində yüksək çəkiyə malik beynəlxalq bazarlarda ayrı-ayrı əmtəə qruplarının qiymətləri artmaqdadır, bu da yerli bazara da ötürülür. Digər tərəfdən, xarici amillərlə yanaşı, yerli, müəyyən məhsulların qiymətinə birdəfəlik düzəliş edilməsi və kənd təsərrüfatı məhsullarının qiymətlərinin dalğalanması inflyasiyanın artmasına səbəb olur. Eyni zamanda, ümumi inflyasiyadan qida, enerji daşıyıcıları və tütünü istisna edən baza inflyasiyası hədəf göstərici çərçivəsində (yanvar 2.1 faiz) qorunub saxlanır, bu da uzunmüddətli inflyasiya gözləntilərinin sabit olduğunu göstərir. Qiymətlər dəyişikliyinin nisbi sərtliklə xarakterizə olunduğu xidmət sektorunun inflyasiyası, yanvar ayına olan vəziyyətə görə, bir az artıb və 3 faiz təşkil edir. Müvafiq olaraq, sərt qiymətlər ölçüləri inflyasiya proseslərinin daha az əhatəli olduğunu göstərir. Lakin, əvvəlki ayla müqayisədə sərt qiymətlər inflyasiyasının mülayim artımı inflyasiya gözləntilərinin artması risklərini gücləndirir. Bu tendensiyalar fonunda, Gürcüstanın Milli Bankının yenilənmiş mərkəzi ssenarisinə əsasən, 2026-cı il üçün inflyasiya proqnozu bir qədər yuxarıya doğru yenidən nəzərdən keçirilib. Mərkəzi ssenariyə əsasən, cari inflyasiya dinamikası hələ də müvəqqətidir və dırnaqarası “ikinci raund” effektlərinə səbəb olmur, bu da təzyiqin digər mal və xidmətlərin qiymətlərinə keçməməsi deməkdir. Müvafiq olaraq, digər bərabər şərtlərdə, müvəqqəti amillərin təsirinin azalması fonunda inflyasiya 2026-cı ilin ikinci rübündən etibarən tədricən hədəf göstəriciyə yaxınlaşacaq və il ərzində orta hesabla 3.7 faiz olacaq.
İqtisadi aktivlik tədricən uzunmüddətli artım tempinə qayıdır, bu da tələb tərəfdən qiymətlərə təzyiqi yumşaldır. Xüsusilə, Gürcüstanın Milli Bankının yenilənmiş mərkəzi ssenarisinə əsasən, 2026-cı ildə real ÜDM artımı 5 faizə bərabər olacaq. Kredit aktivliyinin tarazlıq səviyyəsində saxlanılması da iqtisadi artım tempinin normallaşmasına əlavə olaraq töhfə verəcək.
Yüksək qeyri-müəyyənliyi nəzərə alaraq, inflyasiyaya artım istiqamətində təsir edən risklər aydın görünür, lakin eləcə də azalma istiqamətində təsir edən risklər də hələ də qorunub saxlanır. Bundan irəli gələrək, Pul Siyasəti Komitəsi mərkəzi ssenari ilə birlikdə həm yüksək inflyasiya, həm də aşağı inflyasiya riskləri ssenarilərini nəzərdən keçirib və qərar qəbul edərkən müxtəlif istiqamətlərdə təsir göstərən riskləri nəzərə alıb.
Yüksək inflyasiya riski ssenarisinin reallaşması halında, fundamental proseslər mərkəzi ssenariyə nisbətən pul siyasəti dərəcəsinin daha yüksək trayektoriyasını tələb edir. Xüsusilə, yanvar ayında sərt qiymətlər ölçülərinin əvvəlki aylarla müqayisədə mülayim artımı uzunmüddətli inflyasiya gözləntilərinin artması risklərini gücləndirir. Eyni zamanda, real iqtisadi fəallığın yüksək səviyyədə saxlanılması və yüksək məhsuldar sektorlarda artımın normallaşması fonunda, inflyasiya üzərində əlavə təzyiq yaradacaq. Həmçinin, bu ssenariyə əsasən, qlobal olaraq geosiyasi vəziyyətin gərginləşməsi halında, beynəlxalq əmtəə bazarlarında qiymətlərin gözləniləndən daha çox artması və yerli bazara ötürülməsi mümkündür.
Makroiqtisadi təhlil və yuxarıda qeyd olunan ssenarilərin müzakirəsi nəticəsində Pul Siyasəti Komitəsi orta dərəcədə sərtləşdirilmiş pul siyasətinin qorunub saxlanmasını optimal hesab edib və pul siyasətinin faiz dərəcəsini dəyişməz, 8%-də saxlayıb. Pul siyasətinin faiz dərəcəsinin sonrakı dəyişikliyi yenilənmiş gələcək məlumatlardan və risklərin reallaşmasından asılı olacaq. Mərkəzi ssenariyə uyğun olaraq, yalnız cari birdəfəlik amillər tükəndikdən və inflyasiya hədəf səviyyəsinə yaxınlaşdıqdan sonra Milli Bank pul siyasətini normallaşdırmağa davam edəcək. Lakin, müxtəlif birdəfəlik amillərin təsiri nəticəsində inflyasiya uzun müddət hədəf səviyyəsindən yuxarıda qalarsa, Pul Siyasəti Komitəsi mövcud sərt mövqeni gözləniləndən daha uzun müddət qoruyub saxlamağa və zərurət halında, onu daha da sərtləşdirməyə belə hazırdır.
Gürcüstanın Milli Bankı qiymətlərin sabitliyini qoruyub saxlamaq üçün bütün vasitələrdən istifadə edəcək, bu isə ortamüddətli dövrdə ümumi qiymət səviyyəsi artımının 3%-ə yaxın olması deməkdir.
Pul Siyasəti Komitəsinin növbəti iclası 2026-cı ilin martın 25-də keçiriləcək.
Məlumatı Gürcüstanın Milli Bankı yayır.
