Gürcüstanın Baş naziri İrakli Ğaribaşvilinin və Ermənistan Respublikasının Baş naziri Nikol Paşinyanın rəhbərliyi ilə Hökumət Administrasiyasında Gürcüstan və Ermənistan Respublikası arasında Hökumətlərarası İqtisadi Əməkdaşlıq Komissiyasının 13-cü iclası keçirilib.

Hökumət Administrasiyasının məlumatına əsasən, görüşdə Gürcüstan və Ermənistan arasında iqtisadi əməkdaşlıq məsələləri müzakirə edilib; Ölkələr arasında iqtisadi əlaqələri və ticarət, eləcə də nəqliyyat, enerji, turizm, mədəniyyət və təhsil sahələrində əməkdaşlıq potensialından danışılıb.

“Hökumət başçısının qeyd etdiyi kimi, Ermənistan Gürcüstan üçün ən mühüm ticarət tərəfdaşlarından biridir və son illər ərzində Gürcüstanın əsas ticarət tərəfdaşları arasında ilk onluğa daxildir. 2023-cü ilin göstəricilərinə əsasən, Ermənistan əvvəlki il olduğu kimi ticarət dövriyyəsinə görə on əsas ticarət tərəfdaşı ölkəsi arasında 6-cı yerdədir.

İrakli Ğaribaşvili, Hökumətlərarası İqtisadi Əməkdaşlıq Komissiyasının Gürcüstan və Ermənistan arasında iqtisadi, ticarət, nəqliyyat və mədəni əlaqələrin gücləndirilməsi üçün mühüm platforma olduğunu bildirib.

İclasda regionda sülhün və sabitliyin vacibliyinə toxunulub. Hökumət başçısı qeyd edib ki, Gürcüstan sülh prosesinin təşviq edilməsi üçün səylərini davam etdirir və gələcəkdə də bu istiqamətdə iştirakını davam etdirməyə hazırdır.

İclas başa çatdıqdan sonra tərəflər Gürcüstan və Ermənistan Respublikası arasında strateji tərəfdaşlığın qurulması haqqında birgə bəyannamə imzalayıblar. Sənədi Gürcüstan tərəfdən Gürcüstanın Baş naziri İrakli Ğaribaşvili, Ermənistan Respublikası tərəfdən isə Ermənistan Respublikasının Baş naziri Nikol Paşinyan imzalayıb.

İki ölkənin baş nazirləri həmçinin Gürcüstan və Ermənistan Respublikası arasında Hökumətlərarası İqtisadi Əməkdaşlıq Komissiyasının 13-cü iclasının protokolunu da imzalayıblar.

Kənd təsərrüfatı sahəsində əməkdaşlığa dair anlaşma memorandumu imzalanıb. Tərəflər səhiyyə sahəsində qarşılıqlı anlaşma memorandumu imzalayıblar; Həmçinin – iki ölkənin diplomatik nümayəndəliklərinin və konsulluq müəssisələrinin iş şəraitinin yaxşılaşdırılması haqqında saziş də imzalayıblar. Sənədləri Ermənistan və Gürcüstan Nazirlər Kabinetinin üzvləri imzalayıblar”- məlumatda qeyd edilib.