Ermənistan Silahlı Qüvvələrinin Baş Qərargah rəisi, general-mayor Eduard Asrian Gürcüstanda səfərdə olub. Gürcüstanın Müdafiə Qüvvələrinin komandanı, general-mayor Qiorqi Matiaşvili erməni həmkarını qəbul edib.

Rəsmi qarşılanma mərasimindən sonra həmkarlar görüş keçiriblər.

Gürcüstan Müdafiə Nazirliyinin mətbuat xidmətinin məlumatında tərəflərin Gürcüstan və Ermənistan arasında çoxəsrlik tarixi dostluq və mehriban qonşuluq münasibətlərinə diqqət yetirdikləri qeyd olunub. Görüşdə müdafiə qüvvələrinin komandanları ikitərəfli əməkdaşlıq məsələlərini müzakirə ediblər.

Qurumdan verilən məlumatda general-mayor Qiorqi Matiaşvilinin Ermənistan Silahlı Qüvvələrinin rəhbərini Gürcüstan Müdafiə Qüvvələrində həyata keçirilən islahatlarla tanış etdiyi deyilir. Həmçinin görüşdə hərbi təhsil sahəsində əməkdaşlığın dərinləşdirilməsi perspektivlərinə toxunulub.

Baş Qərargahda keçirilən görüşdə Gürcüstan Müdafiə Qüvvələrinin nümayəndələri və Ermənistan Respublikasının nümayəndə heyətinin üzvləri iştirak ediblər.

İkitərəfli görüşdən sonra general-mayor Eduard Asrian Qəhrəmanlar Meydanında Gürcüstanın ərazi bütövlüyü uğrunda həlak olmuş qəhrəmanların abidəsi önünə əklil qoyub və döyüş əməliyyatlarında həlak olan döyüşçülərin xatirəsini ehtiramla yad edib.

Səfər çərçivəsində Ermənistan Silahlı Qüvvələrinin nümayəndə heyətinin üzvləri NATO-Gürcüstan Birgə Təlim və Qiymətləndirmə Mərkəzində (JTEC) və Çavuşlar Akademiyasında da olublar.