Gürcüstan Milli Turizm Administrasiyası Tokionun “Tourism EXPO Japan” beynəlxalq sərgisində iştirak edir
Yaponiyanın paytaxtı Tokioda dünyanın ən böyük beynəlxalq turizm sərgilərindən biri olan “Tourism EXPO Japan” keçirilib.
Sərgi çərçivəsində Gürcüstan Milli Turizm Administrasiyasının rəhbəri Maia Omiadze Yaponiyanın Turizm Agentliyinin rəhbər şəxsləri, PR və marketinq agentlikləri, aparıcı aviaşirkətlər və turoperatorlar ilə işgüzar görüşlər keçirib.
Görüşlərdə Yaponiyadan turist axınının artım dinamikası və Yaponiya bazarında Gürcüstanın tanınma səviyyəsinin yüksəldilməsi məsələləri müzakirə olunub. Birbaşa hava əlaqəsinin inkişaf perspektivlərinə, marketinq kampaniyalarının planlaşdırılmasına və Gürcüstanın dörd fəsilli turizm istiqaməti kimi mövqeləndirilməsinə xüsusi diqqət yetirildi.
Paralel olaraq, Gürcüstanın stendində təqdimatlar təşkil edilib və burada Yaponiya mediası ilə turizm sənayesinin nümayəndələri Gürcüstanın turizm marşrutları, görməli yerləri və turizm məhsulları ilə ətraflı tanış olublar.
Sərgidə Milli Turizm Administrasiyası ilə yanaşı, Acara Turizm və Kurortlar Departamenti, Svanetinin təyinat yerinin idarə edilməsi təşkilatı (DMO) və özəl sektorun təxminən on şirkəti iştirak edib.
“Tourism EXPO Japan” sərgisində 80-dən çox ölkə və region təmsil olunub. Sərgidə 1300-dən çox turizm şirkəti, aviaşirkət və təşkilat iştirak edirdi. Ziyarətçilərin sayı isə təxminən 180 min nəfər təşkil edib.
Milli Turizm Administrasiyasının mətbuat xidməti məlumat yayır.