Gürcüstanın Baş naziri İrakli Ğaribaşvili Brüsseldə görüşlərini davam etdirir. Avropa İttifaqı Şurasının Prezidenti Şarl Mişel İrakli Ğaribaşvilini işgüzar naharda qəbul edib.

Gürcüstan Hökumət Administrasiyasının mətbuat xidmətinin məlumatına əsasən, görüşün əsas mövzusu Gürcüstanın Avropa İttifaqına daxil olması prosesi olub. Məlumata əsasən, tərəflər Avropa Komissiyasının 12 prioritetinin yerinə yetirilməsi baxımından Gürcüstanın əldə etdiyi irəliləyişi müzakirə ediblər.

“Liderlər ölkənin Avropa perspektivinin tanınmasının tarixi qərar olduğunu qeyd edərək, ilin sonunda Gürcüstana namizəd statusunun verilməsinin ölkə üçün, o cümlədən polarizasiyanın sona çatması üçün kritik əhəmiyyət kəsb etdiyini vurğulayıblar. Söhbət zamanı regionda mövcud təhlükəsizlik mühiti, Gürcüstanın işğal olunmuş ərazilərindəki çətin təhlükəsizlik və humanitar vəziyyətə xüsusi diqqət yetirilib. Gürcüstanın regionda sülhün və sabitliyin təmin edilməsində mühüm rolu vurğulanıb.

Hazırkı vəziyyətdə baş nazir Avropa İttifaqının həm sülh və təhlükəsizliyin təşviqi, həm də Qara dəniz regionu çərçivəsində Gürcüstan və Avropa İttifaqı arasında nəqliyyat, enerji və infrastruktur əlaqələrinin dərinləşdirilməsi baxımından regionda iştirakının vacibliyini vurğuladı.  İrakli Ğaribaşvili Şarl Mişelə Gürcüstanın Avropa İttifaqına üzvlük prosesini dəstəkləməkdə göstərdiyi şəxsi səylərə və Gürcüstanın Avropa perspektivini dəstəklədiyinə görə təşəkkür edib” – məlumatda deyilir.