Gürcüstan hökumətinin qərarına əsasən, 2022-2030-cu illər üçün təhsil və elm üzrə vahid milli strategiya və Gürcüstanın Təhsil və Elm naziri Mixeil Çxenkeli tərəfindən şəxsən hökumət üzvlərinə təqdim edilmiş eyni strategiyanın 2022-2024-cü illər üçün fəaliyyət planı təsdiq edilib.

Təhsil Nazirliyi tərəfindən verilən məlumatda, Mixeil Çxenkelinin hökumətin iclasında çıxışı zamanı təhsil sahəsində mövcud islahatların effektivliyinin artırılması baxımından vahid milli strategiyanın hazırlanmasının vacibliyindən danışdığı və fəaliyyət planı haqqında hökumət üzvlərinə ətraflı məlumat verdiyi bildirilir.

“Qeyd etmək lazımdır ki, 2022-2030-cu illər üçün təhsil və elm strategiyası və fəaliyyət planı Gürcüstanın baş naziri İrakli Ğaribaşvili və təhsil və elm naziri Mixeil Çxenkelinin 2021-ci ildə təqdim etdiyi onillik plana əsaslanır. Sənəd davamlı inkişaf hədəflərini nəzərə alır və cari təhsil islahatı çərçivəsində əldə olunan nəticələrin gücləndirilməsini təşviq edəcək.

Sənəddə vəziyyətin təhlili nəticəsində müəyyən edilmiş problem və çağırışlar nəzərə alınmaqla üç əsas sektoral-prioritet istiqamət müəyyən edilib:

1. Cəmiyyətin və dövlətin ehtiyaclarına yönəlmiş keyfiyyətli və dayanıqlı təhsil və elm sisteminin təmin edilməsi;

2. Bərabər, inklüziv və rəngarəng təhsil və elm sisteminin təmin edilməsi;

3. Təhsil və elm sisteminin idarəedilməsi və hesabatlılıq sisteminin təmin edilməsi.

Öz növbəsində, sənəddə sektoral prioritetlər əsasında 15 strateji məqsəd və 28 vəzifə müəyyən edilib.

Strategiya həmçinin Avropa İttifaqı, Birləşmiş Millətlər Təşkilatı, Dünya Bankı və Avropa İqtisadi Əməkdaşlıq və İnkişaf Təşkilatı tərəfindən təhsil və elm sektorunda müəyyən edilmiş problemlərin aradan qaldırılması üçün hazırlanmış tövsiyələri də əhatə edir.

Strategiyaya əlavə edilən fəaliyyət planına gəlincə, o, məsuliyyət daşıyan tərəflər və müvafiq nəticə göstəriciləri göstərilməklə, prioritet istiqamətlərin yerinə yetirilməsi üçün müəyyən vaxtda yazılmış konkret, müvafiq məqsədlərə köklənmiş, sübuta əsaslanan fəaliyyətləri əks etdirir. Tədbirlər planı rüblük əsasda tərtib edilir və müvafiq büdcə ilə təsdiq edilmiş üç illik icra müddətini əhatə edir.

Mixeil Çxenkelinin təşəbbüsü ilə 2022-2030-cu illər üçün təhsil və elm üzrə vahid milli strategiya üzərində iş 2021-ci ildən başlayıb. Sənəd “Gürcüstanda Dövlət İdarəçilik İslahatına Dəstək (PAR)” layihəsinin, Dünya Bankının “İnnovasiya, İnklüzivlik və Keyfiyyət  – Gürcüstan I2Q ​​(IBRD)” layihəsinin, UNDP Georgia-nın və Avropa İttifaqının Skillsforjobs proqramının ekspertlərinin dəstəyilə və Gürcüstan hökumətinin qərarı ilə təsdiq edilmiş “Siyasət sənədlərinin hazırlanması, monitorinqi və qiymətləndirilməsi qaydaları”na uyğun olaraq hazırlanıb. İş prosesində həmçinin sahə mütəxəssisləri, donor təşkilatlar və Gürcüstan hökumətinin 28 iyun 2021-ci il tarixli 304 nömrəli qərarı ilə yaradılmış 2022-2030-cu illər üçün Gürcüstanın təhsil və elm strategiyası və fəaliyyət planının hazırlanması üzrə idarələrarası şuranın üzvləri aktiv şəkildə iştirak ediblər.

Siyasət işinin şəffaflığını təmin etmək və vətəndaşları, cəmiyyəti və maraqlı tərəfləri cəlb etmək məqsədilə, Gürcüstanın Təhsil və Elm Nazirliyi onlayn formatda ictimai məsləhətləşmələr keçirib, onların əsasında əldə olunmuş geribildiriş nəzərə alınmaqla strategiyanın və fəaliyyət planının yekun variantı hazırlanıb”- deyə Təhsil Nazirliyinin yaydığı məlumatda qeyd olunur.