“Axali” partiyasının üzvü, Çxorotsğunun keçmiş deputatı Vaxtanq Lemoncava “Gürcü Arzusu – Demokratik Gürcüstan”ın üzvü və Çxorotsğunun seçki qərargahının rəhbəri Cumber İzoriaya məxsus avtomobilə zərər vurub. Məlumatı “Gürcü Arzusu”nun mətbuat xidməti yayır.

Onların məlumatına əsasən, hadisə dünən, gecə saatlarında baş verib.

“Gürcü Arzusu”nda izah edirlər ki, Vaxtanq Lemoncava “Axali-Qirçi-Droa” koalisiyasının Çxorotsğu seçki qərargahının rəhbəri Qiqa Lemoncavanın atasıdır.

“Avtomobili Lesicine kəndinin mərkəzində qoydum, görüşə getdik və qayıdanda gördüm ki, avtomobilin yanına insanlar toplaşıb. Sonradan aydınlaşdırdım ki, sərxoş vəziyyətdə olan Vaxtanq Lemoncava avtomobilin üstünə cumub, qeyri-adekvat hərəkət edib, söyüş söyüb, avtomobilin olduğu istiqamətə daşlar atıb. Faktın çoxlu şahidləri var. Bizim üçün, “Gürcü Arzusu” üçün seçki kampaniyasının dinc şəraitdə keçməsi vacibdir, lakin rəqiblərimiz tərəfindən aqressiyaya, zorakılığa, şəxsi məkana müdaxiləyə, tərəfdarlara qarşı bullinq cəhdlərinə, xuliqanlığa şahid oluruq, bu da həqiqətən qütbləşmə yaradır. Bu hərəkət müşahidə kameraları tərəfindən qeydə alınıb və istintaq başladılıb. Rəqibləri məğlubiyyətə alışmağa və qanun çərçivəsindən çıxmağa çalışmamağa çağırıram” – Cumber İzoria bildirir.

Bu gün saat 14:00-da “Gürcü Arzusu”nun Çxorotsğu qərargahında brifinq keçiriləcək.