Gürcüstanda iqtisadi artım may ayında 6,4%, yanvar-may aylarında isə 7,8% təşkil edib

İlkin qiymətləndirməyə əsasən, Gürcüstanda may ayında real iqtisadi artım 6,4% təşkil edib. Nəticədə, cari ilin ilk beş ayı (yanvar–may) üzrə iqtisadi artım göstəricisi 7,8%-ə çatıb.

İqtisadiyyat və Dayanıqlı İnkişaf Nazirliyinin məlumatına görə, may ayında ƏDV ödəyicisi olan müəssisələrin dövriyyəsi ötən ilin eyni dövrü ilə müqayisədə 8,7% artıb. Eyni zamanda, yeni qeydiyyatdan keçən müəssisələrin sayı 2,2% artaraq 6 542 vahid təşkil edib.

May ayında iqtisadi artıma ən çox müsbət töhfə informasiya və kommunikasiya, maliyyə və sığorta fəaliyyəti, emal sənayesi, nəqliyyat və anbarlaşdırma, səhiyyə və daşınmaz əmlakla bağlı fəaliyyət sahələrində müşahidə olunan artım verib.

Bundan əlavə, nazirliyin yaydığı məlumata əsasən, yanvar–may aylarında yüksək iqtisadi artıma xarici ticarət sahəsində qeydə alınan müsbət tendensiyalar da təsir göstərib. Belə ki, ixrac 19,8% artaraq 3 107,7 milyon ABŞ dollarına çatıb, yerli ixrac (təkrar ixrac istisna olmaqla) isə 66,1% artaraq 1 929,1 milyon ABŞ dolları təşkil edib.

Gürcüstan iqtisadiyyatında qeydə alınan müsbət tendensiyalar və yüksək iqtisadi artım ölkə iqtisadiyyatının dayanıqlığını qoruduğunu göstərir.