Gürcüstan Daxili İşlər Nazirliyi qanunsuz dövriyyədən çıxarılan 37 milyon laridən çox dəyəri olan 700 kiloqrama yaxın müxtəlif növ narkotik vasitəni məhv edib

Gürcüstan Daxili İşlər Nazirliyi-nin daxili işlər nazirinin əmri əsasında yaradılmış daimi komissiyası Gürcüstanın müxtəlif bölgələrində müxtəlif vaxtlarda keçirilmiş istintaq tədbirləri nəticəsində qanunsuz dövriyyədən götürülmüş 700 kiloqrama qədər narkotik vasitəni məhv edib. Bu maddələrin ümumi dəyəri “qara bazar”da 37 milyon laridən çoxdur.

Məlumatı Gürcüstan Daxili İşlər Nazirliyi yayıb.

“Ekspert-kriminalistika departamentinin əməkdaşları xüsusi, müasir standartlara uyğun yüksəktemperaturlu sobada (insinerator) xüsusilə külli miqdarda müxtəlif növ narkotik vasitəni məhv ediblər. Onların arasında ‘heroin’, ‘kokain’, ‘alfa-PVP’, ‘klofedron’, ‘MDMA’, ‘buprenorfin’, ‘tramadol’, ‘diazepam’, ‘kodein’, ‘metadon’ və ‘kannabis’ var. Həmçinin psixotrop və yeni psixoaktiv maddələr də məhv edilib.

Mövcud qanunvericiliyə uyğun olaraq, narkotiklərin məhv edilməsi prosesi ətraf mühitin mühafizəsi üzrə müasir standartlara uyğun həyata keçirilib və prosesdə daimi komissiyanın üzvləri ilə yanaşı, Gürcüstan Daxili İşlər Nazirliyi əməkdaşları ilə birlikdə Baş Prokurorluğun və Səhiyyə Nazirliyinin nümayəndələri də iştirak ediblər”, – deyə məlumatda bildirilir.