Givi Mikanadze: Sentyabr ayından etibarən Gürcüstan dünyanın təhsilin bütün pillələrinin dövlət tərəfindən tamamilə ödənişsiz təmin olunduğu azsaylı ölkələri sırasına qoşulacaq

Bu, tarixi nəticə və tarixi qərardır. Hakim siyasi komandanın Siyasi Şurası elə bir qərar qəbul edib ki, faktiki olaraq sentyabr ayından, yeni tədris ili başlayanda, Gürcüstan təhsilin bütün pillələrinin dövlət tərəfindən tam şəkildə pulsuz təmin edildiyi dünyanın azsaylı ölkələri sırasına qoşulacaq. Bu barədə Gürcüstanın təhsil, elm və gənclər naziri Givi Mikanadze Gürcüstanın Birinci Kanalının “Aktual mövzuda müzakirə” verilişində bildirib.

Mikanadzenin sözlərinə görə, məktəbəqədər təhsil də tamamilə pulsuzdur, halbuki 2013-cü ilə qədər ödənişli idi.

Nazir bildirib:

“Siyasi komandamız uşaq bağçalarının pulsuz olması barədə qərar qəbul etdikdən sonra bağçalara qeydiyyatdan keçən uşaqların sayı 30 faiz artdı. Yəni 2013-cü ilə qədər hər üç uşaqdan biri ailəsinin maddi imkanı olmadığı üçün bağçaya gedə bilmirdi. Məktəb təhsili pulsuzdur və 2014-cü ildən etibarən dövlət məktəblərində dərsliklər də şagirdlərə pulsuz paylanılır. Peşə təhsili həm dövlət, həm də özəl kolleclərdə dövlətin vauçer sistemi ilə maliyyələşdirilir. İndi isə dövlət ali təhsil müəssisələrində təhsil tamamilə pulsuz olur. Bu o deməkdir ki, dövlət təhsilin bütün pillələrinin maksimum əlçatan olmasını təmin edir. Əgər insanın istəyi, məqsədi və motivasiyası varsa, biz bu qərarla onun motivasiyasını daha da artırırıq. Statistik göstəricilər də bunu təsdiqləyir.”

Nazirin sözlərinə görə, bu il vahid milli imtahanlarda 43 mindən çox abituriyent qeydiyyatdan keçib və onların 79 faizdən çoxu ilk seçim kimi dövlət universitetlərini göstərib.

“İlkin seçimlərin sayı dövlət universitetləri üçün özəl universitetlərlə müqayisədə dörd dəfə çoxdur. Xatırladım ki, ölkədə fəaliyyət göstərən 64 ali təhsil müəssisəsindən yalnız 19-u dövlət universitetidir. Abituriyentlərin 79 faizdən çoxu ilk seçim kimi dövlət universitetlərini, 20 faizdən bir qədər çoxu isə özəl universitetləri seçib. Bu tendensiya cəmiyyətin həm qəbul edilən siyasi qərara, həm də dövlət universitetlərinə olan müsbət münasibətini açıq şəkildə göstərir.”

Mikanadze əlavə edib ki, bu il ilk dəfə olaraq abituriyentlər milli imtahanlar çərçivəsində ali təhsil proqramı ilə yanaşı peşə təhsili istiqamətlərini də seçə biliblər və bu imkandan 6 mindən çox gənc istifadə edib.

Nazirin sözlərinə görə:

“Bu istiqamət sürətlə inkişaf edir. Ənənəvi qəbul zamanı peşə təhsili müəssisələrinə 5 mindən bir qədər çox şəxs qeydiyyatdan keçirdi və qəbul ildə iki dəfə – yaz və payız semestrləri üçün aparılırdı. Bu il isə ilk dəfə olaraq abituriyentlər ali təhsil proqramı ilə yanaşı ən azı üç peşə istiqaməti də seçə bildilər və 6 mindən çox gənc bu imkandan yararlandı.

Dövlət ali təhsil müəssisələrində pulsuz təhsil üçün 21 600 yer ayrılıb. Bununla yanaşı, milli imtahanlarda minimum keçid balını toplayan, lakin ali məktəbə qəbul üçün kifayət qədər bal əldə etməyən gənclər əlavə imtahan vermədən seçdikləri peşə proqramlarından birinə avtomatik qəbul olunacaqlar. İstər dövlət, istərsə də özəl peşə kollecində təhsil alsınlar, onların təhsil haqqı dövlət tərəfindən 100 faiz maliyyələşdiriləcək.”