Xalq Müdafiəçisi Aparatında heç bir dəyişiklik nəzərdə tutulmur. Bu barədə heç bir məlumat yoxdur – bu barədə ombudsmanlığa namizədlərdən biri, xalq müdafiəçisinin müavini Qiorqi Burjanadze Birinci Kanala açıqlayıb.

Jurnalistlər Qiorqi Burjanadzedən soruşublar: “Nino Lomcarianın Qiorqi Burjanadzeni birinci müavin təyin etmək niyyətində olduğu xəbəri yayılıb. Əgər xalq müdafiəçiliyinə namizədlər parlamentdə dəstək görməsələr o, səlahiyyətləri  icra edəcək. Bunun ehtimalı varmı?”.

Qiorqi Burjanadze bu məlumatın yanlış olduğunu və onu gözdən salmaq məqsədi daşıdığını bildirib.

“Bu, yəqin ki, şayiələrdən biridir. Tamamilə yanlış məlumatdır, bu, mənim nöqteyi-nəzərimdən məni daha da gözdən salmağa, guya konspirasiya olması ilə bağlı hansısa nəzəriyyə irəli sürməyə xidmət edir. Bu absurddur. Qanunvericilik xalq müdafiəçisinin seçilməməsi halında fəaliyyətin necə davam edəcəyini tənzimləyir. Xalq müdafiəçisinin öz işini mükəmməl aparan və çox yaxşı peşəkar olan birinci müavini Tamar Qvaramadzedir. Beş ildir birlikdə işləyirik. Bir daha deyirəm, bu məlumat heç bir şəkildə həqiqətə uyğun gəlmir, uydurmadır. Bunu kim deyibsə, heç bir müvafiq arqumenti yoxdur. Mən bunu məni gözdən salmaq üçün əbəs cəhd kimi qiymətləndirirəm.

Xalq Müdafiəçisi Aparatında heç bir dəyişiklik nəzərdə tutulmur. Müavinin vəzifəyə təyin edilməsi və ya vəzifədən azad edilməsi məsələsi ombudsmanın səlahiyyətindədir. Bu barədə heç bir məlumat yoxdur və bizim heç nəyi sübut etmək öhdəliyimiz yoxdur. Bu barədə kim deyibsə, dediklərini sübut etməyə və bəzi sübutlar təqdim etməyə borcludur” – deyə Qiorqi Burjanadze bildirib