“Geosky” aviaşirkətinin sərnişin istiqaməti olan “Georgian Wings” Tbilisi-Batumi istiqamətində ilk nümayiş uçuşunu bu gün həyata keçirib və müntəzəm sərnişin uçuşları layihəsinin təqdimatını keçirib.

Təqdimat çərçivəsində Acara Muxtar Respublikasının və biznes sektorun nümayəndələri aviaşirkət tərəfindən planlaşdırılan müntəzəm daxili uçuşların başlanması planı və təyyarənin təqdimatı ilə tanış olublar.

Gürcüstanın iqtisadiyyat və davamlı inkişaf nazirinin müavini Mariam Kvrivişvili gürcü aviasiya sənayesinin gücləndirilməsinin təqdirəlayiq addım olduğunu bildirib.

“Bugünkü tədbir də yerli aviaşirkətin Tbilisi ilə Batumi arasında müntəzəm kommersiya uçuşları həyata keçirməyə dövlətin əlavə iştirakı və yardımı olmadan kommersiya baxımından hazır olmasının nümunəsidir. Xüsusilə sevindirici haldır ki, ilkin mərhələdə iki şəhər arasında uçuşlar həftədə 12 tezliklə həyata keçiriləcək. Bu o deməkdir ki, Tbilisi ilə Batumi arasında tələbat artıb. Şirkət, öz növbəsində, iki şəhər arasında hərəkətliliyin artmasına kömək edə biləcək. Təbii ki, bu, Tbilisidən Batumiyə və Batumidən Tbilisiyə turist axınının hərəkətini asanlaşdıracaq. Tbilisi və Batumidə iki beynəlxalq hava limanının olması Tbilisiyə gələn turistin Batumiyə daha rahat və tez səyahət etməsinə, eləcə də Batumiyə gələn beynəlxalq səyyahın bir səfərdə paytaxta və digər şəhərlərə səyahətini təmin edir. Biz şirkətə uğurlar arzulayırıq və əminik ki, birgə səylərlə ölkəmizin turizm sənayesini, eləcə də aviasiya sənayesini daha da gücləndirə biləcəyik”- deyə Mariam Kvrivişvili açıqlayıb.

İyulun 28-dən “Georgian Wings” həftədə 12 tezliklə 70 nəfərlik İtaliya-Fransa istehsalı təyyarə ilə Tbilisi-Batumi-Tbilisi istiqamətində müntəzəm sərnişin reysləri həyata keçirəcək. Uçuş təxminən 55 dəqiqə davam edəcək.