Qara Dəniz “Taxıl Dəhlizi Sazişi”nin müddəti iki ay uzadıldı – bu haqda Türkiyə Prezidenti Rəcəb Tayyib Ərdoğan bildirib.

Türkiyə Prezidentinin sözlərinə görə, o, rus və ukraynalı həmkarlarına, eləcə də BMT-nin baş katibi Antonio Quterreşə göstərdikləri səylərə görə təşəkkür edir.

BMT, Türkiyə, Rusiya və Ukrayna ilkin olaraq ötən ilin iyulunda İstanbulda Rusiya-Ukrayna müharibəsinin başlamasından sonra 2022-ci ilin fevralında dayandırılmış Ukraynanın üç Qara dəniz limanından taxıl ixracını bərpa etmək üçün saziş imzalayıblar.

“Ölkəmizin səyləri, rus dostlarımızın dəstəyi və ukraynalı dostlarımızın töhfəsi ilə Qara Dəniz “Taxıl Dəhlizi Sazişi”nin daha iki ay müddətinə uzadılması qərara alındı. Biz ümid edirik ki, Rusiya ilə Ukrayna arasında müharibənin sona çatacağı günləri əvvəlcə daimi atəşkəslə, sonra isə sülhlə görəcəyik. Bundan başqa, rus dostlarımız türk gəmilərinin Mikolayev və Olvia limanlarından çıxmasına mane olmayacaqlarını açıqlayıblar. Biz buna görə minnətdarıq”, – deyə Rəcəb Tayyib Ərdoğan bildirib.