Flyone Kişinyovdan Batumi istiqamətinə birbaşa reyslər həyata keçirməyə başlayıb

Flyone Moldova paytaxtı Kişinyovdan Batumi istiqamətinə birbaşa reyslər həyata keçirməyə başlayıb. Bu barədə Tbilisi və Batumi hava limanlarının idarəedici şirkəti “TAV Georgia” məlumat yayıb.

Onların məlumatına görə, Batumi beynəlxalq hava limanı Kişinyovdan ilk reysi artıq qəbul edib.

“Batumi hava limanında Kişinyovdan gələn ilk sərnişinlər simvolik tədbirlə qarşılanıb. Airbus A320 tipli təyyarə ilə Moldova paytaxtından Batumiyə ilk reysdə 182 sərnişin gəlib, Batumi–Kişinyov reysində isə 161 sərnişin olub ki, bu da bu istiqamətə yüksək tələbatın olduğunu göstərir.

Yay naviqasiya mövsümündə Flyone Kişinyov–Batumi–Kişinyov marşrutu üzrə həftədə üç dəfə uçuşlar həyata keçirəcək. Hazırda reyslər bazar ertəsi və cümə axşamı günləri icra olunur, 14 iyuldan etibarən isə çərşənbə günü də əlavə olunacaq.

Flyone Moldova aviaşirkətidir və əsas bazası Kişinyov Beynəlxalq Hava Limanında yerləşir. Şirkət Avropa və Yaxın Şərq istiqamətində müntəzəm və çarter reysləri həyata keçirir. Qeyd olunur ki, Batumi beynəlxalq hava limanında şirkətin törəmə brendi olan Flyone Armenia da fəaliyyət göstərir və İrəvandan həftədə üç dəfə uçuşlar yerinə yetirir. Flyone-un donanması (Ermənistan törəmə şirkəti ilə birlikdə) ümumilikdə 10-dan çox təyyarədən ibarətdir və əsasən Airbus A320 və A321 tipli hava gəmilərindən formalaşır”, – deyə “TAV Georgia”nın məlumatında bildirilir.