Qori Munisipalitetinin Erqneti kəndində 6 saat ərzində İnsidentlərin Prevensiyası və Reaksiya Mexanizminin 109-cu iclası keçirilib. Dövlət Təhlükəsizlik Xidmətinin İnformasiya-analitik Departamentinin direktor müavini İrakli Antadze görüşdən sonra verdiyi məlumatda qanunsuz saxlanılan vətəndaşların azadlığa buraxılması məsələsinin əsas müzakirə mövzusu olduğunu bildirib.

O, həmçinin qeyri-qanuni borderizasiya prosesinin də əsas müzakirə mövzusu olduğunu açıqlayıb.

“Müzakirə edilən əsas məsələ vətəndaşlarımızın azadlığa buraxılması idi. Bununla bağlı məsləhətləşmələr davam edəcək və imkanlar pəncərəsi bağlı deyil. Ümid edirik ki, qanunsuz həbsdə olanların hamısı ailələrinə qaytarılacaq. Həmçinin, qanunsuz saxlanılma və əhalinin sərbəst hərəkətinin məhdudlaşdırılması kimi proseslərlə bilavasitə əlaqəli olan qanunsuz borderizasiya məsələsi də əsas müzakirə mövzusu olub. Mərkəzi hakimiyyətin mövqeyi bu çirkin praktikanın qarşısını almaqdır və sərbəst hərəkət məhdudlaşdırılmamalıdır.

Gürcü polisinin Çorçana postu ilə bağlı onlar tərəfindən tələblər irəli sürüldü. Bir daha aydınlaşdırdıq ki, bu standart postdur, məqsədi təhlükəsizliyi təmin etməkdir və başqa funksiyası yoxdur. Mərkəzi hakimiyyət sərbəst hərəkəti məhdudlaşdırmır və bütün iştirakçıları, onların tərəfindən də oxşar təcrübələrdən istifadə etməyə çağırır”-deyə İrakli Antadze bildirib.