Fransa prezidenti Emmanuel Makron Ermənistanın baş naziri Nikol Paşinyanla görüşüb. Yelisey Sarayının yaydığı bəyanatda görüşün oktyabrın 3-də baş tutduğu bildirilib.

Makron Paşinyanı Ermənistanla Azərbaycan arasında sülh müqaviləsini mümkün qədər tez imzalamağa çağırıb, çünki bu, xalqın maraqlarına daxildir.

Yelisey Sarayının yaydığı bəyanatda deyildiyi kimi, Fransa prezidenti həmçinin, Ermənistanın suverenliyini, ərazi bütövlüyünü, erməni xalqının sülh və demokratiyaya can atmasını dəstəkləmək qərarını təsdiqləyib.

“Prezident beynəlxalq hüququ və bölgədə yaşayan xalqın maraqlarını qoruyaraq sülh razılaşmasına mümkün qədər tez nail olmaq məqsədi daşıyan Ermənistan və Azərbaycan arasında davam edən danışıqlara yönəlik sadiqliyini bir daha təsdiqləyib”, – deyə bəyanatda bildirilib.

Makron və Paşinyan həmçinin Fransa və Ermənistan arasında ikitərəfli əməkdaşlığı gücləndirməyə davam etmək barədə razılığa gəliblər.