DTX-nin rəhbərinin birinci müavini Laşa Mağradze Nyu-Yorkda BMT-nin Terrorla Mübarizə Həftəsində iştirak edir
Gürcüstan Dövlət Təhlükəsizliyi Xidmətinin rəhbərinin birinci müavini Laşa Mağradze nümayəndə heyəti ilə birlikdə ABŞ-da səfərdədir.
Laşa Mağradze BMT-nin Terrorla Mübarizə Həftəsi çərçivəsində Nyu-Yorkda keçirilən dünya ölkələrinin antiterror qurumlarının rəhbərlərinin konfransında iştirak edir. Konfransın əsas mövzusu **“Terrorsuz gələcək: üzv dövlətlərin rəhbərliyi və fəaliyyəti ilə çoxtərəfli yanaşmalara qlobal sadiqliyin gücləndirilməsi”**dir.
Dövlət Təhlükəsizliyi Xidmətinin məlumatına görə, Terrorla Mübarizə Həftəsi çərçivəsində BMT-nin mənzil-qərargahında terrorizmlə mübarizə sahəsində mövcud çağırışlar, onların aradan qaldırılması yolları, eləcə də çoxtərəfli şəbəkələrdən istifadə etməklə koordinasiya və əməkdaşlığın gücləndirilməsinə həsr olunmuş panel müzakirələri keçiriləcək.
Məlumata əsasən, Gürcüstan nümayəndə heyəti həmçinin BMT Baş Assambleyasının plenar iclasında iştirak edəcək. İclas çərçivəsində BMT-nin Qlobal Terrorla Mübarizə Strategiyasının yenilənmiş variantının təsdiqlənməsi nəzərdə tutulur.
Konfrans çərçivəsində paralel tədbirlər də planlaşdırılıb. Həmin tədbirlərdə iştirakçı ölkələr və beynəlxalq təşkilatlar terrorizm və onun maliyyələşdirilməsinə qarşı mübarizədə ən yaxşı təcrübə və yanaşmalar ətrafında fikir mübadiləsi aparacaqlar.