Dövlət Təhlükəsizliyi Xidməti cari ilin fevralın 14-də Kutaisi-Barselona aviareysini həyata keçirən təyyarənin göyərtəsində partlayıcı qurğunun olması faktı üzrə edilmiş yalan bildirişin təşəbbüskarının müəyyən edilməsi istiqamətində həyata keçirilmiş əməliyyat, axtarış və istintaq tədbirləri nəticəsində bir Gürcüstan vətəndaşını saxlayıb. Məlumatı DTX yayır.

DTX-nin yaydığı məlumat üzrə, sözügedən şəxs başqasının istifadəsində olan gürcü mobil operatorundan Macarıstanda yerləşən “Wizz Air” aviaşirkətinin baş ofisinə konkret göyərtədə partlayıcı qurğunun olması barədə zəng edib.

“Alınmış bildirişə əsasən, uçuş rejimində olan W66417 Kutaisi-Barselona reysi Kutaisi Beynəlxalq Hava Limanına qaytarılıb və burada Dövlət Təhlükəsizliyi Xidməti Daxili İşlər Nazirliyi ilə birlikdə protokolda nəzərdə tutulmuş bütün zəruri və təxirəsalınmaz tədbirləri operativ şəkildə həyata keçirib. Sözügedən təyyarədə heç bir partlayıcı qurğu və ya maddə aşkar edilməyib.

Dövlət Təhlükəsizliyi Xidmətinin Terrorla Mübarizə Mərkəzində Cinayət Məcəlləsinin 3 ildən 6 ilədək və ya 6 ildən 9 ilədək azadlıqdan məhrum etməni nəzərdə tutan 331-ci maddəsi ilə terrorçuluq haqqında yalan məlumat vermə faktı üzrə istintaq aparılır.

Bundan başqa, Dövlət Təhlükəsizliyi Xidmətində müxtəlif yalan bildirişlər faktı üzrə istintaq aktiv şəkildə davam edir. Bu mərhələdə bildirişlərin əksəriyyətinin xarici ölkələrdən edildiyi müəyyən edilib. İstintaq çərçivəsində həyata keçirilən əməliyyat və məxfi əməliyyatlar nəticəsində həm ölkə miqyasında, həm də ölkə hüdudlarından kənarda konkret şəxslər və qruplar müəyyən edilib.

Yalan bildirişlərə gəlincə, Dövlət Təhlükəsizliyi Xidməti təhdidləri müəyyən etmək və riskləri minimuma endirmək üçün bütün lazımi tədbirləri görüb.

Sonda xüsusilə qeyd etmək istərdik ki, Dövlət Təhlükəsizliyi Xidmətinin bu cür faktlara qanuna uyğun reaksiyası olduqca sərt olacaq”- DTX-nin məlumatında qeyd olunur.