Daxili İşlər Nazirliyinin İnsan Hüquqlarının Müdafiəsi Departamentində yeni yaradılmış “nifrət nitqinə qarşı mübarizə” üzrə idarə fəaliyyətə başlayıb.

Daxili İşlər Nazirliyinin məlumatına görə, idarənin əsas funksiyası insan ləyaqətini alçaldan və ya təhqiredici xarakter daşıyan, eləcə də nifrət nitqi ehtiva edən ictimai şəkildə yayılan bəyanatların monitorinqi və proaktiv şəkildə aşkar edilməsidir. Bu hallar Gürcüstanın İnzibati Xətalar Məcəlləsində nəzərdə tutulan hüquqpozma əlamətlərinə uyğun qiymətləndirilir.

Eyni zamanda idarə mümkün hüquqpozma törədən şəxsin müəyyən edilməsi, kimliyinin təsdiqlənməsi, inzibati icraat materiallarının hazırlanması, inzibati xəta haqqında protokolun tərtib edilməsi və səlahiyyətli qaydada ümumi məhkəmələrə göndərilməsi ilə məşğul olacaq.

“İlkin mərhələdə idarənin ştat sayı 10 vəzifə vahidi ilə müəyyən edilib. İdarənin əməkdaşları öz fəaliyyətlərini ölkədə artıq qüvvədə olan qanunvericilik çərçivəsində həyata keçirəcəklər”, – deyə Daxili İşlər Nazirliyinin məlumatında bildirilir.