Donald Tramp: Benzinin qiymətləri hazırda müşahidə etdiyimizdən xeyli daha sürətlə ucuzlaşmalıdır. Bu məsələnin araşdırılması üçün Ədliyyə Nazirliyinə tapşırıq vermişəm

ABŞ Prezidenti Donald Tramp bəyan edib ki, benzinin qiymətləri hazırda müşahidə olunan tempdən xeyli daha sürətlə aşağı düşməlidir. O, məsələ ilə bağlı dərhal araşdırmaya başlanılması üçün Ədliyyə Nazirliyinə tapşırıq verdiyini bildirib.

ABŞ prezidentinin sosial şəbəkədə yazdığına görə, neft şirkətləri xam neftin qiymətinin əhəmiyyətli dərəcədə ucuzlaşmasına baxmayaraq, yanacaq qiymətlərini kifayət qədər sürətlə azaltmırlar.

“Böyük neft şirkətləri benzinin qiymətini nefti aldıqları kəskin şəkildə aşağı qiymətlərə uyğun səviyyədə endirmirlər. Başqa sözlə, istehlakçılardan artıq pul alırlar. Benzinin qiymətləri mənim indi gördüyümdən xeyli daha sürətlə aşağı düşməlidir”, – deyə Tramp qeyd edib.

Tramp bu açıqlamanı beynəlxalq bazarlarda neft qiymətlərinin geriləməsindən sonra verib. Hazırda bir barel Brent markalı neftin qiyməti 77 dollar, ABŞ xam neftinin (WTI) bir bareli isə 73 dollara qədər enib.