“Deutsche Welle” – İsveçrədə seçicilərin referendumda təqdim olunan neytrallıq qaydalarının sərtləşdirilməsi barədə təklifi rədd edəcəyi gözlənilir

İsveçrədə seçicilərin bazar günü keçirilən referendumda təqdim olunan neytrallıq qaydalarının sərtləşdirilməsi barədə təklifi rədd edəcəyi gözlənilir, – bu barədə “Deutsche Welle” İsveçrənin dövlət yayımçısı SRF-in göstəricilərinə istinadən məlumat yayır.

SRF-in ilkin göstəricilərinə görə, seçicilərin 29%-i neytrallıq qaydalarının sərtləşdirilməsini dəstəkləyib, 71%-i isə daha sərt tədbirlərin görülməsinin əleyhinə olub.

İsveçrənin neytrallığı Napoleon müharibələrinin bitməsindən sonra, 1815-ci ildən etibarən tanınmasına və 1848-ci ildən ölkə konstitusiyasında yer almasına baxmayaraq, hökumətin neytrallıq siyasətini dəqiq olaraq necə həyata keçirməli olduğu aydın şəkildə müəyyən edilməyib. Medianın məlumatına görə, referendum təşəbbüsü ilə sağçı “Xalq Partiyası” ilə əlaqəli olan “Pro Schweiz” təşkilatı çıxış edib. Təşkilat nümayəndələri iddia edirlər ki, Ukraynaya təcavüzü səbəbindən İsveçrənin Moskvaya qarşı iqtisadi sanksiyalar tətbiq etməsindən və Şimali Atlantika Alyansı ilə daha sıx əlaqələr qurmasından sonra ölkə neytrallıq prinsipindən daha da uzaqlaşıb. Təşəbbüs konstitusiyada İsveçrənin heç bir hərbi və ya müdafiə ittifaqına qoşulmaması, həmçinin xaricdə baş verən hərbi münaqişələrdə iştirak etməməsi barədə öhdəliyin əks olunmasını nəzərdə tutur.

Bundan əlavə, təşəbbüsə əsasən, Birləşmiş Millətlər Təşkilatı tərəfindən müvafiq qərar qəbul edilmədiyi təqdirdə, İsveçrə münaqişədə iştirak edən dövlətlərə qarşı heç bir iqtisadi və ya diplomatik sanksiya tətbiq etməməlidir.

Bundan əvvəl İsveçrə hökuməti neytrallığın sərtləşdirilməsi ideyasını rədd edib. Parlamentin hər iki palatası da təşəbbüsün əleyhinə səs verib.