Gürcüstanın baş nazirinin müavini və xarici işlər naziri David Zalkaliani Avropa İttifaqının Cənubi Qafqaz və Gürcüstandakı böhran üzrə xüsusi nümayəndəsi, Cenevrə Beynəlxalq Danışıqlarının həmsədri Toivo Klaar ilə görüşüb.

Gürcüstan Xarici İşlər Nazirliyinin məlumatına görə, görüşdə Rusiyanın siyasəti nəticəsində regionda yaranmış gərgin təhlükəsizlik mühiti, Rusiyanın Gürcüstan və Ukraynanın suverenliyi və ərazi bütövlüyünə qarşı atdığı addımlar müzakirə olunub.

Tərəflər Gürcüstanın işğal olunmuş rayonlarında təhlükəsizlik, humanitar və insan haqlarının çətin vəziyyətini müzakirə ediblər. Rusiyanın qeyri-qanuni və təxribat xarakterli hərəkətləri, o cümlədən Moskvanın Abxaziya və Sxinvalinin faktiki ilhaqı istiqamətində intensiv addımlar atması, militarizasiyanın artırılması, işğal xəttinin tikanlı məftillərlə və süni maneələrlə möhkəmləndirilməsi, işğal olunmuş ərazilərdə insan hüquqlarının pozulmasına diqqət yetirilib. Sərbəst hərəkət və qeyri-qanuni həbslərin məhdudlaşdırılması, qeyri-qanuni həbsdə olan Gürcüstan vətəndaşlarının dərhal azad edilməsinin zəruriliyi vurğulanıb. Görüşdə davam edən Cenevrə danışıqları müzakirə edilib və Rusiyanın beynəlxalq öhdəliklərini, o cümlədən 2008-ci il 12 avqust tarixli atəşkəs razılaşmasını yerinə yetirməsinin vacibliyi vurğulanıb.

“Görüşdə, həmçinin, Gürcüstan hökumətinin münaqişənin sülh yolu ilə həlli üçün siyasəti və səyləri və münaqişənin sülh yolu ilə həlli üçün dövlət strategiyasının işlənib hazırlanması məqsədi daşıyan vahid milli, inklüziv proses müzakirə edilib”, – deyə yayılan məlumatda deyilir.

Onların sözlərinə görə, Gürcüstanın baş nazirinin müavini və xarici işlər naziri Aİ-nin xüsusi nümayəndəsinə Rusiya-Gürcüstan münaqişəsinin sülh yolu ilə həllinə verdiyi töhfəyə görə təşəkkür edib və Aİ-nin münaqişənin sülh yolu ilə həllində fəal iştirakının vacibliyini vurğulayıb.