Daxili İşlər Nazirliyi “oğru dünyası” ilə əlaqədə olan 21 nəfəri həbs edib, daha 9 nəfərə isə ittiham irəli sürülüb, onların arasında xaricdə olan bir “kriminal avtoritet” də var

Gürcüstan Daxili İşlər Nazirliyinin Mərkəzi Kriminal Polis Departamentinin əməkdaşları Baş Prokurorluqla birgə keçirilən əməliyyatlar nəticəsində “oğru dünyası” ilə əlaqədə olan 21 nəfəri saxlayıb, daha 9 nəfərə isə ittiham irəli sürülüb.

Bu barədə Mərkəzi Kriminal Polis Departamentinin direktoru Davit Kiknadze brifinqdə məlumat verib.

Bildirilib ki, son 24 saat ərzində Tbilisi, Şida Kartli və Kvemo Kartli bölgələrində keçirilən polis əməliyyatları məhkəmə qərarı əsasında həyata keçirilib. İttiham olunan şəxslərdən bəziləri penitensiar müəssisədə, digərləri isə qiyabi qaydada məsuliyyətə cəlb olunub. Onların arasında xaricdə olan bir “kriminal avtoritet” də var.

Məlumata görə, aparılan gizli istintaq tədbirləri nəticəsində müəyyən edilib ki, təqsirləndirilən şəxslər maliyyə mübahisələrini həll etmək üçün “kriminal razborkalar” təşkil ediblər. Bu proseslərdə xaricdə olan “kriminal avtoritet” Elmuraz Məmmədov da iştirak edib.

İstintaqla həmçinin müəyyən olunub ki, o, Gürcüstandakı əlaqələri vasitəsilə və şəxsi mənfəət məqsədilə vətəndaşlara “oğru qaydaları”na əsasən böyük məbləğdə pul ödəmək öhdəliyi qoyub, tələblər yerinə yetirilmədikdə isə fiziki zorakılıq və ya öldürmə ilə hədələyib.

Axtarışlar zamanı mobil telefonlar, kompüter avadanlığı, 62 min dollardan çox pul vəsaiti, avtomobillər, döyüş sursatı və odlu silahlar maddi sübut kimi götürülüb.

İstintaq Gürcüstan Cinayət Məcəlləsinin müvafiq maddələri üzrə aparılır və 15 ilə qədər azadlıqdan məhrumetmə cəzasını nəzərdə tutur.

Daxili İşlər Nazirliyi təşkil olunmuş cinayətkarlığa qarşı mübarizənin davam etdirildiyini və “oğru dünyası” ilə əlaqəli şəxslərin müəyyən edilərək məsuliyyətə cəlb olunması üçün əməliyyatların intensiv şəkildə aparıldığını bildirib.