Gürcüstanın Müdafiə Nazirliyində Azərbaycan Respublikası müdafiə nazirinin birinci müavini, Silahlı Qüvvələrin Baş Qərargah rəisi, general-polkovnik Kərim Vəliyev qəbul edilib.

Nazirlikdən verilən məlumatda Müdafiə Qüvvələrinin Baş Qərargahında rəsmi qarşılanma mərasiminin keçirildiyi deyilir. Gürcüstanın müdafiə naziri Cuanşer Burchuladze general-polkovnik Kərim Vəliyevlə görüşüb. Görüşdə tərəflər təhlükəsizlik mühitini və mövcud çağırışları müzakirə ediblər.

“Nazir tərəfdaş və dost ölkələr arasında sıx əməkdaşlığın regionun dinc inkişafına töhfə verdiyini qeyd edib. Burchuladze inkişaf etmiş və sabit Azərbaycanın regionda təhlükəsizliyin və birgə layihələrin uğurla həyata keçirilməsində həlledici əhəmiyyətə malik olduğunu bildirib.

Cuanşer Burchuladze və general-polkovnik Kərim Vəliyev ölkələr arasında müdafiə sahəsində ikitərəfli və üçtərəfli əməkdaşlıq haqqında da danışıblar” – deyə idarədən bildirilir.

Müdafiə Nazirliyinin məlumatına əsasən , Kərim Vəliyevi Gürcüstan Müdafiə Qüvvələrinin komandanı general-mayor Qiorqi Matiaşvili bu gün qəbul edib.

“Tərəflər müdafiə sahəsində ikitərəfli əməkdaşlıq məsələlərini və gələcək planları müzakirə ediblər. Azərbaycan hərbçilərinin Gürcüstanda keçirilən və planlaşdırılan beynəlxalq təlimlərdə fəal iştirakına, hərbi təhsil sahəsində əməkdaşlığa toxunulub. Görüşdə Müdafiə Qüvvələrinin komandanının müavinləri və idarənin yüksək rütbəli hərbçiləri iştirak ediblər” -deyə məlumatda deyilir.

Səfər çərçivəsində nümayəndə heyətinin üzvləri Qəhrəmanlar Meydanında Gürcüstanın ərazi bütövlüyü uğrunda döyüşlərdə həlak olmuş qəhrəmanların xatirəsinə ucaldılmış abidə önünə əklil qoyublar.

Bu barədə Gürcüstanın Müdafiə Nazirliyi məlumat yayır.