Çin Xalq Respublikasının aparıcı aviaşirkətlərindən biri olan “China Southern Airlines” Gürcüstan istiqamətində müntəzəm hava hərəkətini bərpa edəcək.

Mülki Aviasiya Agentliyinin məlumatında 2023-cü ilin yanvarından Urumçi -Tbilisi-Urumçi hava xətti ilə müntəzəm uçuşlar başlayacağı deyilir.

Gürcüstanın Mülki Aviasiya Agentliyinə təqdim edilən müraciətə əsasən, Urumçi ilə Tbilisi arasında qış naviqasiya mövsümünün sonunadək – 2023-cü ilin martın 25-dək müntəzəm uçuşlar həftədə bir dəfə, hər cümə günü yerinə yetiriləcək.

Bu ilin dekabrın 23-də agentlik aviaşirkətə müntəzəm hava hərəkəti üçün lazımi icazə verib.

“China Southern Airlines” 2020-ci ilin yanvarında “Covid-19” infeksiyası ilə bağlı pandemiya səbəbindən Gürcüstana uçuşları dayandırıb. Gürcüstana sonuncu müntəzəm reys 2020-ci ilin yanvarın 23-də həyata keçirilib.