Azərbaycan, Gürcüstan və Türkiyə etibarlı tərəfdaşlardır- bu haqda Azərbaycanın xarici işlər naziri Ceyhun Bayramov Bakıda türk və gürcü həmkarı ilə üçtərəfli görüşdə çıxışı zamanı danışıb.

“Bizim əməkdaşlığımız regionda təhlükəsizliyin və sabitliyin təmin olunması baxımından böyük rola malikdir. Azərbaycan, Gürcüstan və Türkiyə etibarlı tərəfdaşlardır. Bundan əlavə, Azərbaycanın beynəlxalq səviyyədə tanınan ərazi bütövlüyünü bərpa etməsi nəticəsində son illər regionda tarixi dəyişikliklər baş verib”- deyə Bayramov açıqlayıb.

Azərbaycanın xarici işlər naziri bildirib ki, bölgədəki yeni reallıq regionun bütün potensialının istifadəsi üçün yeni perspektivlər vəd edir.

Ceyhun Bayramovun qeyd etdiyi kimi, son beş ildə beynəlxalq arenada inkişaf etmiş hadisələr üçtərəfli formatın aktuallığını və vacibliyini təsdiqləyir.

“Son üçtərəfli görüşümüzdən sonra həm qlobal, həm də regional miqyasda çox şey dəyişib. Son beş ildə beynəlxalq arenada inkişaf etmiş hadisələr üçtərəfli formatın aktuallığını və vacibliyini təsdiqləyir. Təhlükəsizliyin, sabitliyin və rifahın bir sıra çağırışlar səbəbindən artan təzyiq altında olduğu bir şəraitdə regional əməkdaşlığa və inteqrasiyaya artan tələbat var. Bu unikal format hər üç ölkəyə qarşılıqlı maraq doğuran sahələrdə əməkdaşlıqdan faydalanmağa imkan verir. Eyni zamanda, əməkdaşlığımız regional və qlobal təhlükəsizlik və sabitliyə töhfə vermək baxımından da son dərəcə dəyərlidir. Azərbaycan, Türkiyə və Gürcüstan kritik, etibarlı və davamlı tərəfdaşlar olaraq əsl körpü qurucuları kimi çıxış edir və hər zaman müşahidə edilən geosiyasi qarışıqlığın nəticələrini yumşaltmaq üçün qlobal səylərin önündə dayanırlar” – Bayramov açıqlayıb.