Beynəlxalq Valyuta Fondunun son proqnozuna əsasən, ortamüddətli perspektivdə Avropa ölkələri arasında ən yüksək iqtisadi artıma Gürcüstan malik olacaq. Fondun qiymətləndirməsinə görə, 2024-cü ildə Gürcüstanın iqtisadi artımı 5,7%, 2025-ci ildə isə artım tempi 5,1% təşkil edəcək.

Beynəlxalq Valyuta Fondunun hesabatı alıcılıq qabiliyyəti paritetinə istinadən adambaşına düşən ÜDM-ə də şamil edilir. Bu göstəriciyə əsasən, Gürcüstan Avropa İttifaqı üzvlüyünə namizəd beş ölkəni üstələyir və sonrakı illərdə də nisbətən yüksək göstəricini qoruyacaq.

Alıcılıq qabiliyyəti paritetinə istinadən, 2023-cü ildə Gürcüstanın adambaşına düşən ÜDM-i Avropa İttifaqının analoji göstəricisinin 41%-ni təşkil edib, 2029-cu ilə qədər isə 51%-i keçəcək. Müqayisə üçün qeyd edək ki, Avropa İttifaqına namizəd ölkə Şimali Makedoniyada analoji göstərici 2029-cu ildə 42%, Moldovada isə 39% olacaq.