Batumidə, Rurua küçəsində yerləşən qəzalı binada yaşayan 70-ə qədər ailə mənzillə təmin olunub, bununla da “Batumi Qəzalı Evlər Olmadan” hökumət proqramının birinci mərhələsinin həyata keçirilməsinə başlanılıb.

Mənzillər Achara Hökumətinin və Batumi Meriyasının Mənzil Fondundan seçilib.

Achara hökumətinin sədri Tornike Rijvadze və Batuminin meri Arçil Çikovani qəzalı evlərdə yaşayan sakinlər ilə görüşüblər.

Batumi meriyasının məlumatına görə, ailələrə qəzalı korpusda neçə kv.m sahəsi olan mənzilə sahib idilərsə, o böyüklükdə mənzil veriləcək. Onların məlumatına görə, yaşayış evləri ya təmir olunacaq, ya da şəhər meriyası təmir pulunu əhaliyə verəcək.

Məlumat üçün bildirək ki, Rurua küçəsindəki qəzalı binanın sakinləri ötən il meriya tərəfindən kirayəyə çıxarılıblar. “Batumi Qəzalı Evlər Olmadan” proqramı Batumidəki bütün qəzalı binaların yeni yaşayış kompleksləri ilə əvəz edilməsini nəzərdə tutur. Batumi meriyasının məlumatına görə, proqram 80 milyon larini əhatə edir və 2025-ci ilə qədər 3000-ə qədər ailə təmin olunacaq.