Azərbaycanın Prezidenti İlham Əliyev və Bakıda səfərdə olan Slovakiyanın Baş naziri Robert Fitso strateji tərəfdaşlıq haqqında birgə bəyannamə imzalayıblar.

Azərbaycanın liderinin dediyi kimi, bu, iki ölkə arasında əlaqələri ən yüksək səviyyəyə qaldıran çox ciddi siyasi sənəddir. Əliyev bildirib ki, Slovakiya-Azərbaycan münasibətlərində yeni səhifə açılır.

İlham Əliyev və Robert Fitso müdafiə və müdafiə sənayesi sahələrində bir sıra sənədləri imzalayıblar. Tərəflər müdafiə sənayesi sahəsində birgə istehsal platformalarının yaradılması üzrə danışıqlara başlayıblar. Həmçinin, tərəflər enerji sahəsində əməkdaşlığı müzakirə ediblər.

“Azərbaycan öz təbii qazını Avropaya nəql etmək üçün etibarlı yollardan istifadə edir. Avropaya tədarük həcmi 2021-ci ildəki səkkiz milyard kubmetrdən bu il 12 milyard kubmetrə qalxıb. Bu da Azərbaycanın ümumi qaz ixracının 50 faizini təşkil edir. Bizim planımızda 2027-ci ilin sonuna qədər təkcə Avropa İttifaqı məkanına 20 milyard kubmetr qazın nəql edilməsi məsələsi dayanmışdır. Fikrimcə biz buna nail olacağıq”- deyə İlham Əliyev bildirib.

Öz növbəsində, Robert Fitso qeyd edib ki, Slovakiya Azərbaycan ilə Avropa İttifaqı arasında körpü olmağa hazırdır.

“Siz suveren xarici siyasətin tərəfdarısınız. Siz beynəlxalq hüququ müdafiə edən şəxsiyyətsiniz. Siz praqmatik şəxsiyyətsiniz və Sizin xarici siyasətiniz təkcə bir istiqamətdə köklənməyib. Siz ərazi bütövlüyünün nə dərəcədə vacib olduğunu çox gözəl bilirsiniz. Bununla yanaşı, Avropa İttifaqının üzvü olan ölkənin nümayəndəsi kimi deyə bilərəm ki, Avropa İttifaqı ara-sıra digərlərinə ağıl verməyi xoşlayır. Mən isə siyasi təcrübəmdə heç vaxt heç bir ölkənin daxili işlərinə qarışmamağa üstünlük verirəm.
Cənab Prezident, bəzi beynəlxalq təsisatlarda kiçik ölkələrə qarşı ayrı-seçkilik, ədalətsizlik və qeyri-obyektivlik məni məyus edir. Çünki əhali sayına baxdıqda biz kiçik ölkə hesab edilirik. Sizi çox diqqətlə dinləyirdim və bunu məni hava limanında qarşılayan nümayəndə heyətinə də bildirdim. Biz Azərbaycan ilə Avropa İttifaqı arasında körpü olmağa hazırıq” – deyə Fitso bildirib və onun çıxışının tərcüməsini Azərbaycan mediası yayır.