Azərbaycan və Ermənistan sərhədində baş verən atışma nəticəsində bir Azərbaycan hərbçisi həyatını itirib, üç erməni əsgəri yaralanıb. Bakıdan xəbər verildiyi kimi, sıravi əsgər Ayaz Azər Nəzərov Ermənistan Silahlı Qüvvələrinin təşkil etdiyi təxribat nəticəsində həyatını itirib.

Azərbaycan Müdafiə Nazirliyinin məlumatına görə, hadisə yanvarın 11-i günorta saatlarında baş verib.

“Azərbaycan ordusunun bölmələri tərəfindən görülmüş cavab tədbirləri nəticəsində qarşı tərəf susdurulub” – deyə Azərbaycan Müdafiə Nazirliyinin məlumatında deyilir.

Ermənistan Müdafiə Nazirliyində isə Azərbaycan Silahlı Qüvvələrinin artilleriya və pilotsuz uçuş aparatlarından istifadə etdiyi iddia edilir.

Yerevandan isə bildirilir ki, Azərbaycan tərəfindən Ermənistan silahlı qüvvələrinin mövqelərinə açılan atəş nəticəsində üç erməni hərbçi yaralanıb. Onların sözlərinə görə, yaxın vaxtlarda yaralı və ölənlərin sayı dəqiqləşdiriləcək.