Azərbaycan Respublikası Milli Məclisinin sədri Sahibə Qafarova bu gün nümayəndə heyəti ilə birlikdə Gürcüstanda rəsmi səfərdədir.

Tbilisinin Şota Rustaveli adına beynəlxalq hava limanında qonağı Gürcüstan parlamenti sədrinin müavini, Azərbaycan Parlamenti ilə Dostluq Qrupunun rəhbəri Arçil Talakvadze qarşılayıb.

Səfər çərçivəsində Milli Məclisin sədri Gürcüstan parlamentinin sədri Şalva Papuaşvili ilə görüş keçirəcək. Görüşdən sonra Şalva Papuaşvili və Sahibə Qafarova mətbuat qarşısında birgə bəyanatlarla çıxış edəcəklər.

Səfər çərçivəsində Gürcüstan parlament sədrinin müavini və Gürcüstan-Azərbaycan Parlamentlərarası Dostluq Qrupunun rəhbəri Arçil Talakvadzenin Azərbaycan-Gürcüstan Dostluq Qrupunun rəhbəri Arzu Nağıyevlə görüşü nəzərdə tutulub.

Məlumatı Gürcüstan parlamentinin mətbuat xidməti yayır.