Azərbaycan Fransa tərəfinin Yeni Kaledoniyada inkişaf etmiş hadisələrlə bağlı ittihamlarını inkar edir. Azərbaycanın Xarici İşlər Nazirliyinin bəyanatında qeyd olunub ki, Bakı Fransa tərəfinin Azərbaycana qarşı təhqiramiz ifadələrini qətiyyətlə pisləyir və ermənilərin kütləvi şəkildə qətlə yetirilməsi kimi qəbuledilməz ittihamlarla Azərbaycana qarşı böhtan kampaniyasını dayandırmağa çağırır.

“Fransa daxili işlər nazirinin öz ölkəsinin uzun illər həyata keçirdiyi müstəmləkəçilik siyasətinin tərkib hissəsi kimi yerli xalqlara qarşı insanlıq əleyhinə cinayətlər törətməsini, milyonlarla günahsız insanın vəhşicəsinə qətlə yetirilməsi tarixini xatırlaması daha münasib olardı.
Bununla yanaşı, Fransanın daxili işlər naziri Azərbaycanı Yeni Kaledoniyada müstəqillik tərəfdarı etirazları dəstəkləməkdə ittiham etmək əvəzinə, ölkəsinin bu cür etirazlara səbəb olan dənizaşırı bölgələri ilə bağlı uğursuz siyasətinə diqqət yönəltməlidir. Biz bir daha Fransanı ölkəmizə qarşı əsassız iddiaları dayandırmağa çağırırıq” – deyə bəyanatda vurğulanıb.

Fransanın daxili işlər naziri Jerald Darmanin yerli media ilə söhbəti zamanı Azərbaycanı Yeni Kaledoniyanın daxili işlərinə müdaxilə etməkdə ittiham edib.

“Bu, fantaziya deyil. Bəzi separatçıların Azərbaycanla razılaşmasına görə təəssüflənirəm. Hətta müdaxilə cəhdi olsa belə. Fransa öz ərazisində suverendir” – Jerald Darmanin açıqlayıb.

Eyni zamanda, etirazlar zamanı 4 nəfərin həlak olduğu Yeni Kaledoniyada Fransa hakimiyyəti fövqəladə vəziyyət elan edib.