Avstriyanın federal ədliyyə naziri Alma Zadiç sosial şəbəkədə Gürcüstanın ədliyyə naziri Rati Breqadze ilə imzalanmış memoranduma münasibət bildirir. Ədliyyə Nazirliyinin mətbuat xidməti qeyd olunan məlumatı yayır.

Zadiç Gürcüstan və Avstriyanın ədalət mühakiməsi sahəsində daha fəal əməkdaşlıq edəcəklərini bildirib.

“Bu gün gürcü həmkarım Rati Breqadze ilə birgə əməkdaşlıq memorandumu imzaladıq. Gələcəkdə ölkələrimiz ədliyyə sahəsində daha fəal əməkdaşlıq edəcəklər. Məqsədlərdən biri də ədalət mühakiməsi sahəsində Aİ standartlarının tətbiqi və qanunun aliliyinin gücləndirilməsidir. Biz Gürcüstanı Avropa İttifaqı ilə inteqrasiya prosesində dəstəkləyirik və ona kömək edirik. Dəyərli təcrübənizi bölüşdüyünüz üçün təşəkkür edirik” -deyə Zadiç yazır.

Gürcüstanın ədliyyə naziri avstriyalı həmkarı ilə əməkdaşlıq memorandumu imzalayıb. Bu sənəd ədalət mühakiməsi, qanunun aliliyi və insan hüquqlarının müdafiəsi sahəsində Gürcüstan-Avstriya qarşılıqlı əməkdaşlığının gücləndirilməsini təmin edir.

İki ölkə arasında tərəfdaşlıq əlaqələrinin dərinləşdirilməsinə mobil və elektron dövlət xidmətlərinin göstərilməsi, məhkumların reabilitasiyası-yenidən sosiallaşması, cəzaçəkmə müəssisəsində idman, təhsil və məşğulluq proqramlarının idarə edilməsi istiqamətində təcrübə mübadiləsi daxildir.

Memorandum, həmçinin Aİ qanunvericiliyinə yaxınlaşma, mülki, kommersiya və cinayət işləri üzrə qarşılıqlı hüquqi yardım sahəsində əməkdaşlığı nəzərdə tutur.

Məlumatı Ədliyyə Nazirliyinin mətbuat xidməti yayır.