Avropa Yenidənqurma və İnkişaf Bankının prezidenti Odil Reno-Baso sentyabrın 12-14-də Azərbaycan, Gürcüstan və Ermənistana səfər edəcək. Bu barədə təşkilat məlumat yayır, bu Reno-Basonun 2020-ci ildə AYİB prezidenti vəzifəsinə seçildikdən sonra Qafqaz regionuna ilk şəxsi səfəridir.

Səfər 2021-ci ildə baş tutmalı idi, lakin kovid məhdudiyyətləri səbəbindən təxirə salınıb.

Təşkilatdan bildirilib ki, AYİB prezidenti yola düşməzdən əvvəl Azərbaycan, Gürcüstan və Ermənistanın vətəndaş cəmiyyəti nümayəndələrinin müxtəlif qrupları ilə onlayn görüş keçirib.

“Mən böyük səbirsizliklə bankın 30 illik fəaliyyəti ərzində mühüm nəticələr əldə etdiyi Qafqaza səfəri gözləyirəm. Ölçüsündən asılı olmayaraq, region bizim üçün mühüm investisiya yeridir, buraya artıq 10 milyard avrodan çox sərmayə qoymuşuq” – deyə Reno-Baso bildirib.

Təşkilatdan qeyd edildiyi üzrə, AYİB-in prezidenti Gürcüstandakı siyasi rəhbərliklə görüşəcək, həmçinin diplomatlar, beynəlxalq maliyyə institutlarının regional rəhbərləri, biznes assosiasiyalarının rəhbərləri və özəl sektordan mövcud biznes tərəfdaşlar ilə görüş keçirəcək. O, maliyyə və səhiyyə sektorlarında tərəfdaşlarla kredit müqavilələri imzalayacaq.

Odel Reno-Basonun səfəri AYİB-in Gürcüstandakı fəaliyyətinin 30-cu ildönümünə təsadüf edir. Təşkilat son 30 ildə ölkədə 270 layihəyə 5 milyard avro sərmayə qoyub.