Avropa Şurasının Nazirlər Komitəsi Rusiyanı 2008-ci ilin avqust müharibəsində aktiv döyüş əməliyyatları zamanı törədilmiş ağır cinayətləri ətraflı, effektiv və operativ şəkildə araşdırmağa çağırır.

Bu barədə Nazirlər Komitəsinin Strasburq Məhkəməsinin “Gürcüstan Rusiyaya qarşı” məsələsi üzrə 2021-ci il qərarının icrası ilə bağlı bəyanatında deyilir.

Dərc olunmuş sənəddə komitə üzvləri Gürcüstan vətəndaşlarının Cənubi Osetiya və Abxaziyadakı evlərinə qayıda bilməməsindən narahat olduqlarını bildirirlər. Bununla yanaşı, Komitə qeyd olunan bölgələrə nəzarəti həyata keçirən Rusiya Federasiyasından vətənə qayıtmaq istəyənlərin təhlükəsiz şəkildə geri qayıtmasını təmin etməyi qətiyyətlə xahiş edir.

Avropa Şurası Nazirlər Komitəsi bu məsələyə 2022-ci ilin dekabrına planlaşdırılan növbəti iclasında baxacaq.