Avropa İttifaqı liderləri Brüsseldə keçirilən sammitin ilk gününü Gürcüstanın da müzakirə olunduğu Ukrayna, təhlükəsizlik və müdafiə ilə bağlı birgə bəyanat qəbul etməklə başa vurdular.

Sammitin yekun sənədində yazılıb ki, Avropa Şurası Gürcüstan hakimiyyətinin son zamanlar atdığı addımları qeyd edir. Avropa İttifaqı Gürcüstana Avropa yolunda irəliləmək üçün lazımi şərtləri yerinə yetirməkdə yardım etmək üçün onunla sıx əməkdaşlığı davam etdirəcək.

Sammit iştirakçıları Ukrayna və Moldovanın tərəqqisindən danışırlar. Birgə bəyanata əsasən, liderlər Ukraynanın Avropa İttifaqına üzvlük prosesi üçün zəruri şərtləri yerinə yetirmək üçün əsaslı səylərini tanıyır və Ukraynanı islahatlar yolunda davam etməyə çağırırlar.

Bu, Avropa komissarı Oliver Varheymin islahatların gedişi haqqında şifahi hesabat verdikdən sonra Avropa İttifaqı liderlərinin Brüsseldə ilk görüşüdür.