2008-ci ilin müharibəsinin 15-ci ildönümü ilə əlaqədar BMT Təhlükəsizlik Şurasının üzvü olan dövlətlər Rusiya Federasiyasını üzərinə götürdüyü öhdəlikləri tam yerinə yetirməyə və hərbi qüvvələrini Gürcüstandan çıxarmağa çağırıblar.

Albaniya, Fransa, Yaponiya, Malta, Böyük Britaniya və ABŞ nümayəndələri Gürcüstandakı mövcud vəziyyətlə bağlı qapalı görüş keçiriblər.

“Biz Gürcüstanın beynəlxalq səviyyədə tanınmış sərhədləri daxilində müstəqilliyini, suverenliyini və ərazi bütövlüyünü qətiyyətlə təsdiq edirik.   Rusiya Federasiyası tərəfindən Gürcüstanın ərazi bütövlüyünün davamlı olaraq kobud şəkildə pozulmasına görə məyusuq. Biz Rusiyanın qəddar işğalını, bölgədəki hərbi səfərbərliyini və Gürcüstanın ayrılmaz hissəsi olan Abxaziya və Sxinvali bölgəsinə effektiv nəzarəti, eləcə də Rusiyanın Gürcüstanın bu bölgələrinin ilhaqı istiqamətində addımlarını pisləyirik.

Biz bir daha Rusiya Federasiyasının Ukraynaya qarşı əsassız təcavüzünə paralel olaraq Gürcüstan ərazisində, dəniz və hava məkanında hərbi təlimlərin davam etdirilməsi ilə bağlı davamlı təxribatlarını pisləyirik ” – Albaniyanın BMT-dəki daimi nümayəndəsi Ferit Xoca görüşdən sonra bildirib.