Hesabat və tövsiyələrimizdə mediaya xüsusi diqqət yetirilir – bu barədə ATƏT/DTİHB-in Monitorinq Missiyasının rəhbəri Albert Yonson Gürcüstan parlamentində Nika Qvaramia ilə bağlı jurnalistin sualını cavablandırarkən deyib.

Yonson bildirib ki, media şübhəsiz seçki prosesində böyük və vacib amildir.

“Deyə bilərəm ki, hesabat və tövsiyələrimizdə gördüyünüz kimi, mediaya xüsusi diqqət yetirilir. Media seçki prosesində şübhəsiz böyük və vacib amildir. Keçən ilin payızında missiyanın rəhbəri olduğum dövrdə seçki kampaniyası zamanı həftənin altı günü ofisimizdən medianı izləyən və monitorinq aparan səkkiz gürcü var idi. Sonra bu monitorinq təhlil olundu və hamısı bizim hesabatımızdadır. Media şübhəsiz vacibdir”- deyə Albert Yonson bildirib.

Gürcüstanda səfərdə olan ATƏT-in Demokratik Təsisatlar və İnsan Haqları Bürosunun (DTİHB) nümayəndələri Gürcüstan parlamentində görüşlər keçiriblər. Missiya nümayəndələri artıq “Vahid Milli Hərəkat” – birləşmiş müxalifətin “Güc Birlikdədir” fraksiyasının üzvləri, eləcə də “İslahatlar Qrupu”nun nümayəndələri ilə görüşüblər. ATƏT/DTİHB-in nümayəndələri MSK sədri ilə də artıq görüşüblər.