Ermənistanın Korrupsiyaya Qarşı Mübarizə Komitəsi seçki proseslərində seçicilərin satın alınması sxemlərində iştirak edən siyasi qüvvələrin seçkilərdə iştirakının qadağan olunması təşəbbüsü ilə çıxış edib.

Komitənin sədri Artur Naapetyan bu məqsədlə Ermənistanın ədliyyə naziri Srbuhi Galyan-a müraciət edərək qanunvericiliyə dəyişikliklər prosesinin başlanmasını xahiş edib.

“Armenpress”in məlumatına görə, Komitənin bəyanatında qeyd olunur ki, seçki proseslərinin qanuniliyinin təmin olunması xüsusi əhəmiyyət daşıyır. Bu məqsədlə Komitə 2026-cı il Milli Assambleya seçkiləri öncəsi aşkar edilmiş seçki korrupsiyası işləri üzrə aparılan istintaq məlumatlarını ümumiləşdirib, bu cinayətlərin törədilmə mexanizmlərini və onların baş verməsinə şərait yaradan halları müəyyən edib.

Bunun əsasında Ermənistanın Korrupsiyaya Qarşı Mübarizə Komitəsi sədri ədliyyə nazirinə müraciət edərək, cinayətlərin törədilməsinə şərait yaradan halları aradan qaldıracaq və gələcəkdə bu cür sxemlərin istifadəsini minimuma endirəcək qanunvericilik dəyişikliklərinin təşəbbüsünün irəli sürülməsini, o cümlədən belə sxemlərlə əlaqəli siyasi qüvvələrin seçkilərdə iştirakının qadağan edilməsini təklif edib.