Gürcüstan parlamentinin sədr müavini Arçil Talakvadze Gürcüstanın parlament nümayəndə heyətinin Azərbaycanda mühüm görüşləri olacağını bildirib.

Talakvadze səfərin səmərəli olacağına dair gözləntilərinin olduğunu açıqlayıb.

“Parlament sədrinin rəhbərliyi ilə Gürcüstan parlamentinin nümayəndə heyətinin Bakıya, Azərbaycana rəsmi səfəri başlayıb. İki gün ərzində strateji tərəfdaşlarla, həm parlamentin sədri və dostluq qrupunun rəhbəri, həm də Azərbaycan Prezidenti ilə çox mühüm görüşlərimiz olacaq. Azərbaycanın Gürcüstanın Avropaya inteqrasiyasına qəti dəstəyini ifadə etməsinə minnətdarıq. Təbii ki, bu, ölkələrimiz, hökumətlərimiz arasında mövcud olan münasibətlərin, dostluğun davamıdır. Təbii ki, Gürcüstan öz növbəsində, regionda sülh və təhlükəsizliyi dəstəkləmək üçün lazım olan mühüm rol oynamağa hazırdır və biz gələcəyə və regionumuzun və ölkələrimizin ehtiyac duyduğu planlara diqqətimizi yönəltmişik. Azərbaycana səfərin müsbət və səmərəli olacağını gözləyirik” – deyə Arçil Talakvadze açıqlayıb.

Şalva Papuaşvilinin rəhbərlik etdiyi Gürcüstan parlamentinin nümayəndə heyəti Azərbaycan Respublikasında rəsmi səfərdədir. Nümayəndə heyətinə parlamentin vitse-spikeri Arçil Talakvadze, “Gürcü Arzusu” fraksiyasının sədr müavini Qreta Tsitsava, parlament çoxluğunun üzvləri: Savalan Mirzoev, Zaur Darğallı və “Vahid Milli Hərəkat – Birləşmiş Müxalifət “Güc birlikdədir” fraksiyasının üzvü Ramaz Nikolaişvili daxildir.