Andrius Kubilius – Avropa Komissiyası Ukraynanın Avropa İttifaqının təhlükəsiz peyk rabitəsi proqramına qoşulması üçün Ukrayna ilə danışıqlara başlayıb

Avropa Komissiyası Ukraynanın Avropa İttifaqının təhlükəsiz peyk rabitəsi proqramına – IRIS²-yə qoşulması üçün bu ölkə ilə danışıqlara başlayıb, – bu barədə Avropa Komissiyasının müdafiə və kosmos məsələləri üzrə komissarı Andrius Kubilius Parisdə keçirilən Beynəlxalq Kosmos Sammitində çıxışı zamanı bəyan edib.

Onun sözlərinə görə, bu cür əməkdaşlıq Aİ ölkələri və Ukrayna Silahlı Qüvvələrinə öz fəaliyyətlərini “vahid sistem çərçivəsində” daha yaxşı əlaqələndirməyə imkan verəcək.

Kubilius hələ ötən ilin iyul ayında bildirib ki, Ukraynanın IRIS²-yə, yəni Avropa İttifaqının təhlükəsiz peyk rabitəsi sisteminə qoşulmasını istəyir; bu sistemin peyklərinin buraxılmasına isə ehtimal ki, 2029-cu ildən başlanacaq.

Avropa Komissiyasının xüsusilə təhlükəsiz sistem kimi təqdim etdiyi bu infrastruktur, hərbi və diplomatik ehtiyaclar da daxil olmaqla, rabitənin təmin edilməsi üçün nəzərdə tutulub.

“Ukraynanın “Govsatcom” və IRIS²-yə üzv olması ilə bağlı danışıqlara başlamışıq”, – deyə Avropa Komissarı bildirib.

Xatırladaq ki, yanvarda Avropa Komissiyasının müdafiə və kosmos məsələləri üzrə komissarı Andrius Kubilius “Govsatcom” proqramının fəaliyyətə başladığını bəyan edib. Bu proqram Avropa İttifaqının 27 üzv ölkəsinin mövcud peyk rabitəsi imkanlarının birləşdirilməsini nəzərdə tutur.
Bundan əlavə, Aİ 2030-cu ilə qədər hərbi kəşfiyyat məqsədləri üçün istifadə ediləcək təhlükəsiz peyk rabitə sistemi yaratmağa hazırlaşır. Bunun səbəblərindən biri ABŞ-ın Avropa müdafiəsini nə dərəcədə dəstəkləməyə davam edəcəyi ilə bağlı artan şübhələrdir.