Üç gün əvvəl rus tanklarının Gürcüstanın paytaxtına doğru hərəkət etdiyi bir vaxtda prezident Lex Kaçinskinin Tbilisidə tarixi çıxışından 15 il keçir-bu barədə Polşa Prezidenti Ancey Duda bildirib.

“Düz üç gün əvvəl, Rusiyanın hücumu zamanı, rus tanklarının Gürcüstanın paytaxtına doğru irəlilədiyi bir vaxtda prezident Lex Kaçinskinin Tbilisidə tarixi çıxışından 15 il keçdi. Polşanın cəsur prezidenti regionumuzun digər cəsur liderləri ilə birlikdə Tbilisinin mərkəzindən azad dünyanı birləşməyə və Rusiyanın imperialist cəhdlərinə qarşı durmağa çağırdı və xəbərdarlıq etdi: “Bu gün Gürcüstan, sabah Ukrayna, növbəti Baltikyanı ölkələr və sonra bəlkə də mənim ölkəmin, Polşanın vaxtı gələcək !” Bu sözləri çox yaxşı xatırlayırıq”, – Duda Polşa Ordusu Gününə həsr olunmuş mərasimdə deyib.

Dudanın sözlərinə görə, təəssüflər olsun ki, Lex Kaçinskini həmin vaxt məsxərəyə qoyublar və ona qulaq asmayıblar, lakin tarix onun haqlı olduğunu sübut edib.

“Mənim müəllimim Lex Kaçinski NATO-nun Gürcüstan və Ukraynanı da əhatə edəcək şəkildə daha da genişlənməsinin böyük tərəfdarı idi ki, bu da bütün regionumuzun təhlükəsizliyini təmin edəcəkdi. Təəssüf ki, o zaman ona qulaq asmadılar, hücuma məruz qaldı, lakin o, haqlı idi. Tarix bunu sübut edib və bu, hər bir siyasətçinin öyrənməli olduğu bir dərsdir”, – deyə Duda bildirib.