Almaniya federal hökuməti Almaniya kansleri Olaf Şolts və Gürcüstanın Baş naziri İrakli Ğaribaşvilinin görüşü ilə bağlı rəsmi məlumat yayıb.

Press-relizdə qeyd edildiyi kimi, Olaf Şolts İrakli Ğaribaşvili ilə Gürcüstanla çoxşaxəli əməkdaşlığın genişləndirilməsi, cari təhlükəsizlik və Avropa siyasəti məsələləri, həmçinin Rusiyanın Ukraynaya qarşı işğalçılıq müharibəsinin nəticələrini müzakirə edib.

Almaniya federal hökumətinin məlumatına əsasən, kansler Almaniyanın Avropa İttifaqına gedən yolda Gürcüstana dəstəyini davam etdirəcəyini vurğulayıb və Gürcüstan hökumətini islahatlar baxımından lazımi addımlar atmağa çağırıb. Olaf Şoltsun sözlərinə görə, Avropa Komissiyasının tövsiyələri namizəd statusuna gedən yolu göstərir.

Təhlükəsizlik vəziyyətinə gəlincə, press-relizdə qeyd olunduğu kimi, federal kansler Almaniyanın Gürcüstanın beynəlxalq səviyyədə tanınmış sərhədləri daxilində suverenliyini və ərazi bütövlüyünü dəstəkləməyə davam edəcəyini bildirib. Almaniya kansleri və Gürcüstanın Baş naziri açıq və nəticəyönümlü fikir mübadiləsini davam etdirmək, sıx əlaqə saxlamaq barədə razılığa gəliblər.