Alaverdi kəndində premium klass “Alaverdi Resort” mehmanxanası tikiləcək. Gürcüstanın vitse-baş naziri, ətraf mühit və kənd təsərrüfatı naziri Levan Davitaşvili və “Badaqoni” şirkətinin təsisçisi Qoqi Salağaia mehmanxananın tikintisinə başlanılması münasibətilə simvolik kapsulu bünövrəyə atıblar.

“Pandemiyanın yaratdığı çətin vəziyyətə baxmayaraq, Kaxeti bölgəsində növbəti olduqca dəyərli turizm infrastrukturunun yaradılacağı çox vacib və alqışlanası faktdır. Bu, investorların, iş adamlarının pandemiyadan ən çox zərər çəkmiş sahəyə əlavə sərmayələr yatırmağa hazır olduqlarının göstəricisidir. Bu səbəbdən 2022-ci ilin əvvəlində həyata keçirilən bu sərmayə xüsusi əhəmiyyət kəsb edir və Gürcüstanın 2021-ci ildə göstərdiyi iqtisadi canlanma tempinə cavabdır. Bu, Gürcüstanın inkişaf etdiyini nümayiş etdirir; Bu bir tərəfdən iqtisadiyyatdakı artım baxımından inkişaf edir, digər tərəfdən də dəyərlərimizə, adət-ənənələrimizə, tarixi və ya mədəni irsimizin qayğısına qalırıq. “Alaverdi Resort” məhz bunun göstəricisi olacaq. O, Kaxeti bölgəsinin ən cəlbedici yerlərindən biri olacaq və bölgəyə əlavə inkişaf ruhu gətirəcək “-deyə Levan Davitaşvili bildirib.

Badaqoni şirkətinin təsisçisi Qoqi Salağaianın da qeyd etdiyi kimi, layihə xüsusilə məsuliyyətlidir, çünki o, kilsəyə məxsus ərazidə həyata keçiriləcək, bir tərəfdən mədəni irsin qorunması-müdafiəsi, digər tərəfdən isə biznesin inkişafını nəzərdə tutan balansın qorunması üçün vacib olacaq.

Ətraf Mühitin Müdafiəsi və Kənd Təsərrüfatı Nazirliyinin mətbuat xidmətindən verilən məlumata görə, “Badaqoni” şirkəti premium klass “Alaverdi Resort” mehmanxanasının tikintisinə 14 milyon lari sərmayə qoyacaq. 32 otaqlı mehmanxana ildə 8-10 min ziyarətçi qəbul etməyi planlaşdırır. “Alaverdi Resort”-da əksəriyyəti yerli sakinlərdən ibarət 80 nəfər işlə təmin olunacaq. Mehmanxananın 2023-cü ilin sentyabrında açılması planlaşdırılır.

Mehmanxananın tikintisinə başlanılması ilə bağlı keçirilən tədbir çərçivəsində qonaqlar “Badaqoni” şirkətinin Zemo Xodaşeni kəndində yerləşən müəssisəsində olublar, 2010-cu ilin məhsulundan olan ekskluziv şərabı “Saperavi Rezervin” dadına baxıblar. Dequstasiyaya şirkətin enoloqu Dr. Donato Lanati rəhbərlik edib.

Mehmanxananın tikintisinə başlanılması ilə bağlı keçirilən tədbirdə Gürcüstan parlamentinin deputatları, yerli özünüidarəetmə orqanlarının nümayəndələri, Alaverdili mitropolit David , həmçinin “Badaqoni” şirkətinin rəhbərliyi və italiyalı tərəfdaşlar iştirak ediblər.