Gürcü kino və teatr aktyoru Mixeil Qomiaşvili 61 yaşında vəfat edib. Bu barədə məlumatı Gürcüstanın Birinci Kanalına Marcanişvili teatrında təsdiqləyiblər.

Mixeil Qomiaşvili 1961-ci ilin martın 23-də anadan olub. 1986-cı ildə Gürcüstanın Şota Rustaveli adına Dövlət Teatr və Kino Universitetinin aktyorluq fakültəsini bitirib.

“Metexi teatrı”nda işləyib. 1996-cı ildən Marcanişvili Teatrının aktyorudur. Aşağıda sadalananlar onun teatrda ifa etdiyi rollardır: professor (Ameli Notomi “Yanacaq”, rejissor Tata Popiaşvili), Kartlosi (M. Dolidze “Kirayədə yaşayan”, rejissor Kandid Qurqenidze), aktyor (Avto Varsimaşvili “Mənim həyat yolum xəyaldır”, rejissor Avto Varsimaşvili), Məsih (İlia Çavçavadze “Qandeqili”, rejissor Sandro Mrevlişvili), Düpre (Piter Vaysın “Marat-Sad” əsəri əsasında “Hamamda direktor”, rejissor Sandro Mrevlişvili), Antona (Davit Kldiaşvili “Bədbəxtlik”, rejissor Sandro Mrevlişvili), Nikolozi (Laşa Tabukaşvili “Qar kimi bəyaz qar”, rejissor Andro Enukidze), Həkim Estermark (Avqust Strindberq “Ata”, rejissor Temur Çxeidze) və s.

Kino rolları: “Üzüm bağında məhəbbət” (Qiorqi), “Antimoz İverieli” (Mavromordat), “Münaqişə zonası” (Mamao), “Hamı getdi” (Bərbər) və s.

O, “Ata” və “ART-incəsənət” tamaşalarına görə “Qızıl maska” Beynəlxalq Teatr Festivalının Qran-pri mükafatını qazanıb.