ABŞ Ədliyyə Departamenti “Pormula” teleşirkətinin may-avqust aylarında göstərdiyi xidmətlərə görə Amerikanın “Cornerstone Goverment Affairs” lobbi şirkətinə 110 000 dollar ödəməsi ilə bağlı məlumat yayır.

ABŞ Ədliyyə Departamentinin saytında dərc olunan məlumatda “Pormula” teleşirkətinin bu ilin mayında qeydiyyata alındığı deyilir.

ABŞ Ədliyyə Departamentinin yaydığı məlumatda qeyd olunduğu üzrə, lobbi şirkəti ABŞ-da “Pormula”nın kommunikasiya proqramının işlənib-hazırlanması və idarə edilməsi ilə bağlı ictimaiyyətlə əlaqələr və kommunikasiyalar üzrə konsultasiya ilə təmin edir.

Yayılmış məlumatda bildirilir ki, lobbi şirkəti xarici sifarişçi adından Gürcüstanda müstəqil mediaya yönəlik münasibət ilə bağlı cari məsələlər haqqında ABŞ ictimaiyyətini məlumatlandırmaq üçün fəaliyyətlə məşğul olacaq.

ABŞ Ədliyyə Departamentinin məlumatında bunun ictimai fikir liderləri, seçilmiş vəzifəli şəxslər, administrasiya, media, beyin mərkəzləri, ictimai siyasət və ticarət təşkilatları, biznes liderləri, məsələlər üzrə ekspertlər və elmi dairələrlə görüşləri əhatə etdiyi deyilir. ABŞ Ədliyyə Departamenti tərəfindən yayılmış məlumatda bildirilir ki, Dövlət Departamentində brifinqlərdə iştirak edən jurnalist Aleks Raufoğlu, eləcə də ABŞ hökuməti və Konqresinin nümayəndələri ilə əlaqələr təsdiqlənib.