4 oktyabr işi üzrə həbs edilən daha 12 nəfərlə prokurorluq razılaşma sazişi bağlanıb, razılaşmanı qəbul etməyən bir nəfərə isə 5 il həbs cəzası verilib

4 oktyabr işi üzrə həbs edilən daha 12 nəfərlə prokurorluq razılaşma sazişi imzalayıb.

11 nəfərlə bağlanan saziş 1 il həbs və 3 il şərti cəzanı nəzərdə tutur. Bir nəfər — Giorgi Kirvalidze — isə razılaşma əsasında 1 il 6 ay həbs və 3 il şərti cəza alıb. Prokurorun açıqlamasına görə, o, başqa bir cinayət işi üzrə artıq məhkum olunmuşdu.

Razılaşma imzalayanlar arasında Giorgi Kirvalidze, Simon Mağaradze, Kaxaber Kvaçantiradze, Gia Toloraia, Mixeil Toloraia, Avtandil Topçişvili, Yuri Lomidze, Davit Giunaşvili, Giorgi Talaxadze, Beka Maçavariani, Saba Kordzaia və Koba Epitashvili yer alır.

Onlara “strateji və xüsusi əhəmiyyətli obyektin ələ keçirilməsinə cəhd” və “qrup halında zorakılıqda iştirak” kimi maddələr üzrə ittiham irəli sürülüb. Bu maddələr 6 ilə qədər azadlıqdan məhrumetmə cəzasını nəzərdə tutur.

Eyni iş üzrə daha bir şəxs — Manuchar Mikeladze — razılaşmanı qəbul etməyib və məhkəmə onu 5 il həbs cəzasına məhkum edib.

Ümumilikdə 4 oktyabr hadisələri üzrə 64 nəfər cinayət məsuliyyətinə cəlb olunub, onlardan 34 nəfərlə razılaşma sazişi bağlanıb, bir hissəsinin isə cəzası artıq müəyyən edilib.