Gürcüstanın İctimai Yayımçısı 2023-cü ildə Avropa Yayımçılar İttifaqının Yeni Xəbərlər Assambleyasına ev sahibliyi edəcək.

Qərar Cenevrədə keçirilən XVII Yeni Xəbərlər Assambleyasında elan edilib. Avropa Yayımçılar İttifaqına daxil olan ölkələr səsvermə yolu ilə növbəti assambleyanın Gürcüstanda keçirilməsinə qərar veriblər.

İctimai Yayımçının baş direktoru Tinatin Berdzenişvili tədbirdə 150-dən çox nümayəndənin iştirak edəcəyini və müvafiq olaraq Gürcüstanın Avropanın 56 ölkəsindən qonaqları qəbul edəcəyini bildirib.

“Avropa Yayımçılar İttifaqı 56 ölkədən 125 yayımçını birləşdirir və onların tədbirlərinə ev sahibliyi etmək üçün həmişə böyük rəqabət var. Həmişə səsvermə olur və təbii ki, hər bir ölkə iştirak edir. Yeni xəbərlər xüsusilə vacibdir, çünki məlumatlandırma bütün ictimai yayımçıların əsas məqsədidir və 2023-cü ilin noyabrın 23-də Gürcüstanın Yeni Xəbərlər Assambleyasına ev sahibliyi etməsi həqiqətən böyük şərəfdir. 56 ölkədən çoxlu sayda nümayəndə heyəti gələcək, bu ictimai yayımçılar üçün ən təsdiqlənmiş, məlumatlı, konstruktiv xəbər platformasıdır. Bu səbəbdən gözləyirik, hazırlaşırıq və şadam ki, bu şərəf Gürcüstana və İctimai Yayımçıya verilib”-deyə Tinatin Berdzenişvili bildirib.

Yeni Xəbərlər Assambleyası AYİ-yə üzv ölkələrin nümayəndələrinin mühüm strateji mövzuları müzakirə etmək, təcrübə mübadiləsi və ictimai yayım xəbərləri ilə bağlı yeni araşdırmalar və tapıntılar haqqında məlumat almaq üçün bir araya gəldiyi Avropa Yayımçılar İttifaqının illik forumudur.

Forum yeni xəbər direktorlarına və baş redaktorlara xəbərlərin işıqlandırılmasını yaxşılaşdırmaq, media bazarına uyğunlaşmaq və s. haqqında fikir mübadiləsi aparmağa imkan verir.

18-ci Assambleya 2023-cü ilin 22-23 noyabr tarixlərində Tbilisidə keçiriləcək. Tədbir 2005-ci ildən bəri hər il keçirilir .