Շալվա Պապուաշվիլի. Եվրախորհրդարանն իրեն հավասարեցրեց Ռուսաստանի օկուպացիոն քաղաքականությանը. այն դեպքում, երբ Ռուսաստանը մերժում է Վրաստանի ինքնիշխանությունը երկրի տարածքի մեկ հինգերորդի վրա, Եվրախորհրդարանը հրաժարվում է ճանաչել ինքնիշխանությունը նրա ամբողջ տարածքում

Եվրախորհրդարանի և Եվրոպայի խորհրդի խորհրդարանական վեհաժողովի վերջին բանաձևերը վերջնականապես անցան վրացի ժողովրդի կողմից սահմանված կարմիր գծերը և կոպտորեն խախտեցին Վրաստանի ինքնիշխանությունն ու ազգային անկախության սկզբունքները. այս մասին հայտարարել է Վրաստանի խորհրդարանի նախագահ Շալվա Պապուաշվիլին։

Նրա խոսքով՝ «Եվրամիության անունից և եվրոպական ինտեգրման գաղափարի օգտագործմամբ, Եվրոպարլամենտը, գործնականում, ջնջեց վրացի ժողովրդի կողմից պայքարով ու արյամբ ձեռք բերված անկախությունը, ինքնիշխանությունը և վիրավորեց Վրաստանի պետականության գաղափարը»։

«Ռասա Յուկնևիչիենեի պատրաստած զեկույցով Եվրախորհրդարանը, փաստացիորեն, հայտարարեց, որ Վրաստանի իշխանության լեգիտիմությունը որոշելու իրավունքը պատկանում է ոչ թե վրացի ժողովրդին, այլ Բրյուսելի քաղաքական բյուրոկրատիային. որ հենց նա կարող է որոշել, թե ով պետք է կառավարի Վրաստանը, և որ իշխանությունն է իրենց համար ընդունելի։ Սա ժողովրդավարության հիմնարար սկզբունքների մերժումն է։ Ժողովրդավարությունը հիմնված է ժողովրդի ինքնիշխան կամքի վրա, մինչդեռ Եվրախորհրդարանը, գործնականում, պնդում է, որ Վրաստանի իշխանությունը, վրացի ժողովրդի ընտրության փոխարեն, պետք է որոշվի Եվրամիության քաղաքական էլիտայի վստահությամբ։ Այսպիսի մոտեցման մեջ ընդգծվում է ոչ թե հավասար գործընկերների միության, այլ ֆեոդալական վասալության տրամաբանությունը, ըստ որի՝ ինքնիշխանությունը ժողովրդի բնական իրավունքը չէ, այլ վերևից շնորհված արտոնություն։ Այսպիսով, գործնականում, Եվրոպարլամենտն իր վերջին զեկույցում իրեն հավասարեցրեց Ռուսաստանի օկուպացիոն քաղաքականությանը։ Այն դեպքում, երբ Ռուսաստանը մերժում է Վրաստանի ինքնիշխանությունը երկրի տարածքի մեկ հինգերորդի վրա, Եվրոպարլամենտը հրաժարվում է ճանաչել Վրաստանի ինքնիշխանությունը նրա ամբողջ տարածքում։ Աննախադեպ է նաև այն, որ Եվրոպարլամենտը Վրաստանի նախկին նախագահ Սալոմե Զուրաբիշվիլիին, ով գործող սահմանադրության և օրենսդրության հիման վրա չունի պետական լիազորություններ, հիշատակում է որպես երկրի լեգիտիմ ներկայացուցիչ, իսկ ժողովրդի կողմից ընտրված խորհրդարանը, կառավարությունն ու նախագահին հայտարարում է «դե ֆակտո իշխանություն»։ Նման վերաբերմունքը անհարգալից է երկու միլիոն հարյուր հազար ընտրողների հանդեպ, ովքեր խորհրդարանական ընտրություններում արտահայտել են իրենց քաղաքական կամքը»,- հայտարարել է Պապուաշվիլին։

Ինչպես նշել է Պապուաշվիլին, Եվրոպարլամենտի բանաձևը միայն Վրաստանի ժողովրդավարական ինստիտուտներին չէ, որ հակադրվում է։

«Այն ուղղակիորեն առնչվում է Վրաստանի պետության երկրորդ պատմական հենասյանը՝ Վրաց Ուղղափառ Եկեղեցուն։ Զեկույցում եկեղեցու հիշատակումը ռուսական կրոնական ցանցերի և ազդեցության գործողությունների համատեքստում հանդիսանում է պաշտոնական եվրոպական ինստիտուտի կողմից Վրաստանի եկեղեցու վրա առաջին բացահայտ հարձակումը և վիրավորում է միլիոնավոր հավատացյալների կրոնական զգացմունքները։ Բացի այդ, այս վտանգավոր նախադեպը տպավորություն է ստեղծում, որ Եվրոպարլամենտին, ինչպես այլ դեպքերում, այստեղ էլ առաջինն են թույլ տվել շոշափել հողը նման հարձակումների համար։

Վրացական պետության ինքնիշխանության և վրացական եկեղեցու վրա միաժամանակյա գրոհը, ըստ էության, գրոհ է Վրաստանի պետականության գաղափարի վրա։ Երբ Եվրահանձնաժողովը և ԵՄ անդամ երկրների կառավարող քաղաքական ուժերը նման ապատեղեկատվությանն ու քաղաքական դիվերսիային պատասխանում են լռությամբ կամ աջակցությամբ, նրանք պետք է հասկանան, որ չեն կարողանա ձեռքերը լվանալ և պատասխանատվությունը բարդել բոլորի կողմից ատելի Եվրոպարլամենտի վրա։ Ուստի մեզ համար սկզբունքային է, որ Եվրահանձնաժողովը հենց սկզբից տարանջատվի Եվրոպարլամենտի կողմից վրացական եկեղեցու վրա նման կոպիտ հարձակումից»,- հայտարարել է Շալվա Պապուաշվիլին։

Խորհրդարանի նախագահի խոսքով՝ Եվրոպարլամենտի վերջին բանաձևը ևս մեկ անգամ հաստատում է, որ Եվրամիության բյուրոկրատիան գործուն քայլեր ունի անելու Վրաստանի հետ երկխոսությունը վերականգնելու համար։

«Դրա համար անհրաժեշտ է դադարեցնել թշնամական հռետորաբանությունը վրացի ժողովրդի և Վրաց եկեղեցու նկատմամբ. վերջ տալ ապատեղեկատվությանը Վրաստանի ժողովրդավարական ճանապարհով ընտրված իշխանության դեմ. լիովին ճանաչել Վրաստանի պետական ինքնիշխանությունը և անվերապահորեն պահպանել միջազգային իրավունքի հիմնարար սկզբունքները։ Կեղծավորություն է, երբ, մի կողմից, Եվրոպարլամենտը դատապարտում է Ուկրաինայի ինքնիշխանության խախտումը, իսկ մյուս կողմից՝ ինքն է փորձում Վրաստանի իշխանության լեգիտիմության հարցը որոշել վրացի ժողովրդի փոխարեն։ Միջազգային իրավունքի և ժողովուրդների ինքնորոշման սկզբունքների նման ընտրողական կիրառումը նշանակում է, որ Եվրոպարլամենտը հրաժարվում է հարգել պետությունների հավասարությունն ու ժողովուրդների ազատ կամքը և աշխարհը հետ է վերադարձնում այն դարաշրջան, երբ ժողովուրդների ճակատագիրը որոշում էին մետրոպոլիաները, այլ ոչ թե հենց այդ երկրների բնակչությունը»,- հայտարարել է Շալվա Պապուաշվիլին։